Drayber nakatug, mibangga sa pay loader sa Talisay

CEBU, Philippines — Nabangga sa pay loader ang usa ka Sports Utility Vehicle (SUV) human ang drayber nakatulog samtang nagmaneho didto sa sitio Santol, Barangay Campo 4, Dakbayan sa Talisay niadtong Lunes sa buntag.

Ang drayber nga nahinabi ni Jonathan Tumulak, pangu sa City of Talisay-Traffic Operation Development Authority (CT-TODA) nitug-an nga gikan sila sa airport ug paingon sila sa Syudad sa Toledo.

Apan pag abot nila sa dapit nakapiyong ang drayber gumikan sa “kaduka” hinungdan nga nadusmo kini sa pay loader nga naa sa daplin sa karsada.

Matud pa ni Tumulak nga nag clearing operation ang payloader apan wala pa ang drayber sa diha nadisgrasya ang SUV.

Ang sakay sa SUV nga 3-anyos nga bata, usa ka senior citizen ug tulo ka hamtong nga pulos mga paryente ang dali nga giatiman sa emergency responder sa barangay. Luwas ra hinuon kini sila human bun-og ug garas lang ang nahiaguman sa mga sakay niini. Sigon pa ni Tumulak nga mas maayo gyud nga dili pugson ang pagmaneho kung dili kondisyon ang lawas. Dili ra hinuon interesado nga mopasaka og kaso ang tag iya sa payloader ngadto sa drayber sa SUV nga nakatulog. (BANAT NEWS)