CEBU, Philippines — Usa ka nuwebe anyos nga tinun-an ang namatay human maligsi sa usa ka motorsiklo kagahapon sa buntag, Nobyembre 12, 2024, samtang nilabang sa Tiangue Road sa Barangay Babag, Lapu-Lapu City.
Ang inisyal nga report gikan sa Lapu-Lapu City Police Office nagkanayon nga ang biktima, nga si alias Pipoy, residente sa Purok Rambo, Barangay Babag 2, Lapu-Lapu City molabang unta sa kalsada padung sa eskwelahan.
Si Pipoy, usa ka Grade 3 student, naigo ug nahulog sa kalsada, hinungdan sa grabeng kadaut sa iyang ulo.
Ang nakabangga mao si Felipo Natinga, 21 anyos, nga paingon unta sa tindahan aron mopalit og gasolina sa dihang nahitabo ang aksidente.
Sumala niya, wala siya kabantay nga nilabang si Pipoy kay kalit lang kini nisulpot sa tunga sa dalan.
“Nakabantay ko niya, layo pa siya, kanang bataa tarong kaayo naglakaw, nikalit raman siyag labang gud,” matod ni Natinga. Dugang pa ni Natinga, wala siya nagpakusog sa iyang dagan.
Tungod sa pagkabangga, nakadasmag usab si Natinga og laing motorsiklo nga adunay angkas nga nangatumba sab.
Ang motorsiklo ni Natinga naabot ngadto sa pikas nga lane, hinungdan pagkaangol sab sa 30-anyos nga drayber sa maong motor ug ang angkas nga 13-anyos.
Si Police Lt. Col. Christian Torres, ang spokesperson sa Lapu-Lapu City Police Office (LLCPO), nagkanayon nga wala pay kasabutan pa tali sa ginikanan sa biktima ug ni Natinga.
Sutaon sa LLCPO kung naa bay tarong nga pedestrian lane ug mga street signs sa maong dapit aron dili na kini masubli.
Nihangyo usab si Torres sa mga motorista nga magbantay sa mga school zone ug intersection lane.
“Magbinantayon gyud ta nga mo menor, mao nay basic nga gikinahanglan sa mga motorista,” dugang pa ni Torres.
Si Pipoy gideklarar nga patay alas 8:30 sa buntag, usa ka oras ang milabay pag abot sa ospital.
Ang drayber sa motorsiklo karon anaa na sa kustodiya sa kapulisan ug posibleng mag-atubang og kasong reckless imprudence resulting in homicide ug physical injuries.
Natusok sa kabilya
Sa laing hitabo, imbes sa eskwelahan ang padulngan diretso hinoon sa tambalanan ang 10-anyos nga batang lalake human natusok sa kabilya ang iyahang mata sa Sitio Sto. Niño, Barangay Apas, siyudad sa Sugbo kagahapon sa buntag.
Ang bata taga Sitio Mahayahay, Barangay Apas ug tinun-an sa elementarya. Base sa video, ang bata gipalingkod og monobloc chair samtang gagunit pa sa nagtaup nga kabilya sa iyahang mata.
Nagtinabangay ang mga nirespondeng fire volunteers sa pag-alsa sa lingkuranan panaog sa hagdanan dayon gipasakay sa ambulansiya ug gidala sa pinakaduol nga tambalanan.
Wala'y nakakita kung naunsa pagkasangit sa mata sa bata ngadto sa kabilya. Pipila sa mga residente sa dapit ang mitug-an nga nakadungog nalang sila og hilak sa bata.
Usa sa mitabang sa bata mao si Edwin Dionio Jr., diin sa iyahang paggawas sa ilang panimalay nakita nalang niini ang bata nga gahangad na kay ang mata niini natusok sa kabilya nga nagbitay sa wire nga gipahiluna sa ibabaw nga bahin sa dalan.
Matod pa ang kabilya gigamit kini nga tukod sa nagyungyong nga wire.- Kristine de Dios
"Naay nitiyabaw, akong gi-expect kana rang mga bata nga gaduwa, mao to lain naman gyud dugay ang iyahang pagtiyabaw, pagtan-aw nako nagdinaganay iyahang mga ig-agaw maoy akong pagtuo nga gataop kabilya diri sa iyahang mata," sigon ni Dionio.
Nahibulong si Edwin kun nganong nilapos ang kabilya ug natusok sa mata nga dili man kini hait. Nasayran nga nagpuyo sa iyahang igsuon ang biktima tungod kay ang ginikanan niini tua sa layo.
Ang giagian sa bata shortcut kini aron daling maabot sa tunghaan ug aron makadaginot hinungdan nga naglakaw kini.
Ang pangulo sa Department of Social Welfare and Services Portia Basmayor mipasalig nga tabangan ang bata ilabi na sa pagpatambal niini. (BANAT NEWS)