Pawikan gisakyan, mga netizens nasagmuyo

CEBU, Philippines — Ang Provincial Environment and Natural Resources Office (PENRO) sa Negros Oriental maghimo og imbestigasyon bahin sa usa ka viral nga video nga nagpakita sa usa ka bata nga nagsakay sa likod sa usa ka pawikan sa Siaton, Negros Oriental.

Ang maong insidente nakadani og daghang reaksyon sa mga netizens nga nagpakabana alang sa kaayohan sa kinaiyahan ug mga hayop.

Sumala ni Viernove Grefalde, ang head sa PENRO Negros Oriental, moadto sila sa lugar karong adlawa aron mohimo og mga kinahanglanon nga aksyon ug aron madungog ang bahin sa mga tao nga naapil sa video.

“We are as surprised as everybody by the incident. We are directing our CENRO Dumaguete personnel to immediately conduct an investigation,”  ingon ni Grefalde.

Dugang pa niya nga ila kining susihon kung ang pawikan ba gituyo  og kuha sa mga mananagat o aksidente ra kining nakuha sa sa ilang pukot.

Sa 49-segundos nga video, ang bata ug uban pang mga tawo makita nga nag-interact sa pawikan human kini gipagawas gikan sa usa ka pukot.

Daghang mga netizens ang nasagmuyo sa video, kay inay nga buhian dayo kini balik sa dagat, gisakyan-sakyan hinuon kini.

“Hoy bawal mana inyong gibuhat naunsa wala nalang buhie deritso gi among amongan panang mananap,” usa ka komento sa usa ka netizen sa maong video nga adunay kapin sa 420,000 nga views karon.

Ang The Freeman ug Banat News nakig-alayon sa Siatonism, usa ka Facebook page nga nag-reupload sa video. Sumala sa admin sa page, gipadala ra kanila ang video ug wala sila nakaila sa orihinal nga nag-upload kay gi-delete na kini.

Si Grefalde nanawagan sa mga coastal communities ug mga mananagat nga dili hilabtan ang mga pawikan, nga protektado sa balaod ug adunay dakong papel sa pagmentinar sa marine ecosystems.

Gipasabot usab niya ang panginahanglan sa dugang nga awareness sa mga residente, nga dili gyud sila mosamok o mo-interact sa mga pawikan, ilabi na sa panahon sa ilang pag-itlog.

Ang mga pawikan kasagarang moduol sa baybayon sa Negros Oriental aron mag-itlog o mangita og pagkaon.

Gihangyo usab sa PENRO ang mga residente nga ireport dayon ang mga insidente nga adunay labot sa wildlife ngadto sa mga opisyal sa barangay, munisipyo, o DENR aron masiguro nga husto ang pag-atiman ug pag-release sa mga hayop. (BANAT NEWS)