Mga mananagat ug mag-uuma sa Bohol nakadawat og ayuda

CEBU, Philippines — Mga mag-uuma ug mangingisda nga naapektuhan sa mga hagit sa klima sa Probinsiya sa Bohol nakadawat og tag-P10,000 nga ayuda ubos sa programa nga Presidential Assistance for Farmers, Fisherfolk and Families (PAFF) niadtong Nobiyembre 8, 2024.

Giapod-apod kini sa Provincial Government sa Bohol ngadto sa 601 ka mga mag-uuma ug mangingisda didto sa New Capitol Building sa Tagbilaran City.

Ang mga nakadawat naggikan sa munisipalidad sa Balilihan nga adunay 41 ka benepisyaryo, Sikatuna nga adunay 191, Duero nga adunay 113, Calape nga 111, ug Trinidad nga 146, diin matag usa kanila nakadawat sa P10,000 nga hinabang.

Si Roman Dabalos, ang Department of Agriculture (DA) Region 7 Agricultural Program Coordinating Officer sa Bohol (APCO-Bohol), niingon nga tumong sa inisyatiba ang pagtabang sa mga mag-uuma ug mangingisda nga makabangon gikan sa mga hagit nga ilang giatubang sa panahon sa El Niño.

Nanghinaot siya nga mas molambo pa ang agricultura sa Bohol pinaagi aning ayuda og uban pang intervention nga gihatag sa DA, ug pahugtan pa sa mga benepisyaryo ang ilang panaghiusa aron ang sunod nga henerasyon makabenepisyo pa niini.

Samtang si Vice Governor Tita Virtudazo Baja, nipasiugda sa hagit sa pag-ingganyo sa mga batan-ong henerasyon sa pagpanguma.

Tungod niana, hangyo niya nga tudluan sa mga mag-uuma ug mangingisda ang ilang mga anak sa mga buluhaton sa umahan kay usa kini ka paagi aron sila makamao nga manginabuhi ug mobarog sa ilang kaugalingong mga tiil.

Kining programa nga gisuportahan nila ni Oscar Valles ug Ricardo Oblena, parehong nagrepresentar sa gobernador, pinaagi sa Office of the Provincial Agriculture (OPA), uban sa suporta sa Provincial Agricultural Technology Coordinating Office (PATCO-Bohol).