Manindahay daplin sa dalan sa Minglanilla gipasibog
CEBU, Philippines — Gihangyo sa mga sakop sa Minglanilla Traffic Commission (MITCOM) ang mga manindahay sa daplin sa karsada nga mosibog sa ilang estraktura.
Ang grupo ni Glenn Antigua, pangu sa MITCOM matag Sabado ug Domingo mopahigayon og education campaign sa mga maninda daplin sa karsada.
Ilang pasabton ang manindahay nga sila gipadad-an og memorandum gikan sa Department of Interior and Local Government (DILG) sa paghawan sa sidewalk.
Ang administrasyon ni mayor Rajiv Enad nipili nga pasabton ang manindahay nga ang gihimo sa kagamhanan mao lang ang pagtuman sa ilang trabaho.
Apan gipasalig sa mayor nga dili nila pasagdan ang mga naninda ilabi na kay tinarong ang ilang panginabuhian ug andam sila motabang kun unsa man ang ilang mahimo.
Dili gusto si Enad nga abugon dayon ang manindahay kay dinhi man sila nabuhi.
Si Ronald Waskin, traffic education officer niklaro nga dili nila abugon ang manindahay tungod kay sila nisabot sa ilang kahimtang apan tinguha lang nila nga dili usab sila makabalda sa dagan sa mga sakyanan. (BANAT NEWS)
- Latest
