CEBU, Philippines — Nihangyo ang konseho sa Dakbayan sa Talisay ngadto sa Department of Public Works and Highways (DPWH) nga unta madali ang pag-ayo sa mga gutter diha sa kabukiran sa siyudad.
Kini tungod kay dako kini og ikatabang sa mga motorista nga dili dayon molahos sa ubos kong makasugat og disgrasya sa dalan.
Ang gutter sa mga barangay sa Campo 4 ug Manipis naguba atol sa pagdahili sa yuta sa nilabay’ng buwan.
Gani niadtong Nobiyembre 1 ning tuiga usa ka 23-anyos nga motorista ang napalgan nga patay human kini natagak sa pang-pang.
Si Konsehal Danny Caballero, chairman sa Committee on Resiliency nagkanayon nga mas maayo nga iprayoridad sa DPWH ang mga accident prone areas.
Gawas niini, nisugyot usab si Caballero nga magbutang og mga signages o reflector diha sa kadalanan aron maalarma ang motorista sa ilang pagmaneho.
Nipahimangno usab si Caballero sa mga motorista nga magmabinantayon sa pagsubay diha sa bukirang barangay ilabi na nga panahon na karon sa ting uwan.
Subay niini, anaa na usab sa mga barangay level sa Dakbayan sa Talisay ang Aksyon Agad Team.
Human karong buwana gihingusgan sa barangay nga ang ilang kaugalingon nga kawani maoy magmentinar sa pagpanglimpiyo sa mga kanal ug dili na kinahanglan magpaabot pa sa mga sakop sa Aksyon Agad sa city hall.
Ang pangulo sa Aksyon Agad Team Gary Togonon nipadayag nga sa maong mga pamaagi masiguro nga dili na masinati ang mga pagbaha panahon sa pagbunok sa kusog nga uwan.
Gipadayag ni Togonon nga maka-focus usab sila sa pagputol sa mga punoan sa kahoy nga naghatag og risgo sa katawhan.
Giangkon ni Togonon nga dili nila maato ang mga request sa pagpanglimpiyo sa mga kanal ilabi na kong magdungan ang pipila ka mga barangay.
Si Togonon nihangop sa mga Aksyon Agad sa barangay ilabi na nga kasagaran sa mga bagyo sa Visayas motumaw sa kataposan nga bahin sa tuig. —/BDB (BANAT NEWS)