CEBU, Philippines — Dili motugot ang konseho sa Dakbayan sa Talisay sa pagpanaygon o pagpakilimos sa kabataan diha sa kadalanan.
Si Konsehal Ofelia Ylanan, chairman sa Committee on Women and Children nagkanayon nga gidili gyud kini sa balaod ang pagpasagad sa mga kabataan.
Matud ni Yllanan nga nameligro nang daan ang mga kabataan diha sa kadalanan gumikan sa mga sakyanan nga maghaguros ang dagan.
Nabantayan nga nagkadaghan karon ang nagpakilimos o manaygon ilabi na diha sa Cebu South Coastal Road (CSCR).
Si Ylanan nagkanayon nga suwayan niya sa paghangyo ang kapolisan ug ang City Social Welfare and Development (CSWD) aron mahatagan kini og aksyon.
Gihimo na nila ang pag-rescue sa kabataan ug grupo sa Badjao kaniadto apan pipila ka adlaw namalik na usab kini sa ilang naandan nga pwesto. Gilaoman nga mas modaghan pa gyud kini sila sa umaabot nga adlaw ilabi na kay nagsingabot ang pasko. —/BDB (BANAT NEWS)