NBI: Sugboanong negosyante ang tag-iya sa luna sa girondang POGO hub sa Agus

CEBU, Philippines — Ipatawag sa National Bureau of Investigation-Cebu District Office (NBI-CEBDO) ang usa ka prominenteng negosyante sa Sugbo aron kumpirmahon ang impormasyong siya ang tag-iya sa lote nga nahimutangan sa Tourist Garden Hotel sa Barangay Agus, Lapu-Lapu City nga nasakpang dunay operasyon sa Philippine Offshore Gaming Operation (POGO) niadtong bulan sa Agosto.

Si NBI-CEBDO head Arnel Pura miingon nga nadiskubrehan nila ang usa ka lease contract sa giablihang usa sa pito ka vaults niadtong Martes, Nobiyembre 5.

Ang kontrata nagpamatuod nga si Zhao Long, anak ni Zhao Shou Qi, ang giingong tag-iya sa Philippine Offshore Gaming Operator (POGO) hub, nagsabot sa maong negosyante aron abangan ang lote ug building sulod sa 30 ka tuig.

“We cannot disclose yet the name of the businessman because will be summoning him to the office to confirm his ownership over that property,” matud ni Pura sa usa ka interbyu sa media.

Si Pura miingon nga ang lease agreement sa negosyante, uban sa ubang mga dokumento sama sa mga resibo ug utility records, mahimong magamit aron suportahan ang mga alegasyon nga si Chinese businessman Zhao Shou Qi ug ang iyang anak mao ang nagdumala sa lugar.

Ang agent-in-charge miingon nga base sa ilang inisyal nga pagtan-aw sa kontrata, nakabutang didto nga ang “property dili gamiton para sa ilegal nga mga katuyoan.

Gidugang pa ni Pura nga ang kontrata naglatid nga kung ang niabang mogamit sa property para sa ilegal nga mga kalihokan, otomatikong ma-revoke ang kontrata ug ang lease guarantee bond, nga nagsilbing deposito, maangkon sa nagpaabang.

Si Pura miingon nga ang lease contract gipirmahan niadtong 2018 tali sa Zhao Long ug ang Cebuano nga negosyante nga mao ang nagpaabang.

Dugang pa niya, ni-deposit ang mga Zhao ug P30 milyones samtang magbayad og P6 milyones sila kada-tuig isip abang sa 1.6 hektarya nga lote.

Si Pura miingon nga sa pagkakaron, ang Cebuano nga negosyante dili pa manubag sa mga ilegal nga kalihokan nga nahitabo sa Tourist Garden Hotel, tungod kay siya ra igo lang nagpaabang sa yuta.

“So, with that contract, I don’t think pwede nato maapil ang owner. Unlike sa Bamban (Province of Tarlac) nga sila mismo ang tag-iya. Sila Mayor (Alice) Guo naa siyay link sa ownership pero kini completely naay lease contract,” gi-eksplikar ni Pura.

Matud pa ni Pura nga sa dihang ang mga Chinese nga negosyante mi-okupar sa lugar tuig 2018, ang hotel ug duha pa ka gagmay nga building pa ang natukod.

“So ang mga Zhao ang nag renovate, and in the course of years from 2018 hangtod 2024 they were able to construct those additional structures housing the POGO,” dugang pa niya.

Si Pura miklaro nga ang Cebuano nga negosyante ang lote ug building sa hotel lang ang iyaha, samtang ang swimming pool ug uban pang mga estruktura sa Tourist Garden Hotel gitukod sa mga Zhao.

Sa laing bahin, ang NBI-CEBDO nag-ingon nga ang mga nakuha gikan sa vaults magpabilin sa ilang kustodiya base sa mando sa korte niadtong Nobiyembre 6, kay gamiton kini sa pagpalig-on sa kasong money laundering ug uban pang mga kaso.

Ang NBI-CEBDO mitug-an nga dul-an P400,000 nga cash, ledgers, ug libro sa accounting niadto Martes ang nakuha gikan sa maong vaults.

Si Pura miingon nga moabot P8.6 milyones ang naa sa ilang kustodiya karon ug ang P8.2 milyones niini nakuha nila atol sa rescue operation niadtong Agosto 31.

“It is our belief that all these evidences, documents, papers and the proceeds would further strengthen the case we file against Mr. Zhao,” matud ni Pura.

Karon nga ang mga dokumento naa na sa ilang kustodiya, si Pura miingon nga kinahanglan pa nilang susihon kini, labi na kay daghan pa nga mga dokumento ang nakuha nga makasuporta sa kaso, sama sa lease contract nga nakit-an.  — /IBM BANAT NEWS)