Mga bata gihimong tigbaligya’g shabu
CEBU, Philippines — Usa ka buy-bust operation ang gihimo sa mga operatiba sa Waterfront Police Station 3 Cebu City Police Office sa Sitio Laray, Barangay Carreta, siyudad sa Sugbo niadtong Huwebes sa hapon.
Apan wala magdahom ang kapulisan ang subject nila nga mga batan-ong lalake pulos menor de edad nga nagpangidaron lang og 15 anyos.
Naa sa drug watchlist ang duha ug nakuhaan sila og lima ka gramo nga shabu nga nagkantidad og P34,000.
Nagkanayon si Police Major John Lynbert Yango, hepe sa Waterfront Police Station 3 nakita nila nga ang maong dapit halos mga menor de edad na ang namaligya og ilegal nga drugas.
Giingong sila maoy gipanggamit sa mga dagkong ilegalista tungod kay dili makasuhan. Hinuon nailhan na sa kapulisan kung kinsa ang mga nagsugod kanila.
Nasayran nga gipatawag na ang mga ginikanan bahin niini apan sila miangkon nga sila mismo maglisod og kontrol sa ilang mga bata.
Sa laing operasyon, usa ka high value individual ang nadakpan sa buy-bust operation sa City Drug Enforcement Unit sa Cebu City Police Office(CCPO) sa Sitio San Juan, Barangay Mambaling, siyudad sa Sugbo, Huwebes sa gabii, Nobiyembre 7, 2024.
Ang dinakpan mao si Elmer Batoon Sugarot alyas Yadz, 35 , taga Sitio Buli, Barangay Duljo Fatima ning siyudad nga nasakmitan og 140 gramos sa gituohang shabu nga nagkantidad og P952,000.
Sa pikas bahin, niabot sa P6.5 milyones nga balor sa ilegal nga drugas ang nasakmit sa Police Regional Office(PRO)-7 sa duha ka adlaw nila nga Simultaneous Anti-Criminality and Law Enforcement Operation gikan sa Nobiyembre 4 hangtod sa Nobiyembre 6, 2024.
Sa anti-illegal drug operations sa PRO-7 nasikop ang 99 ka mga drug personalities ug nasakmit ang 970.08 grams nga gituohang shabu nga nagkantidad og P6.5 million.
Gawas sa shabu nakompiskar sab sa kapulisan ang 103.95 grams nga marijuana nga niabot og dul-an P13,000. — /IBM (BANAT NEWS)
- Latest
