CEBU, Philippines — Patay ang usa ka 32-anyos nga tomboy nga usa ka ex-convict human kini gipusil diha sa Sitio Chicago, Barangay Duljo Fatima, siyudad sa Sugbo kagahapon sa kaadlawon.
Ang biktima mao si Wendolyn Peligrino Abellana, residente sa naasoy nga dapit. Samtang ang mga matud pa mipusil kaniya naila lang sa ngalan nga Jason ug duna kini laing duha ka kuyog nga wala pa nailhi.
Gikan matud pa sa internet café ang biktima dihang giulo pagpusil sa mga suspek nga dali usab nga misibat human mahimo ang krimen.
Ang kapulisan sa Mambaling Police Station 11 sa Cebu City Police Office nga niresponde sa hitabo nakakuha og nga pinakete sa gituohang shabu ug drug paraphernalia.
"Onsehan gihapon sa illegal drugs," pasiunang pagduda ni Police Major Efren Diaz Jr., Hepe sa Mambaling Police Station 11.
Na-recover sab sa kapulisan sa crime scene ang duha ka slug ug upat ka empty shell sa calibre .45 nga armas.
Ang apohan sa biktima nitug-an ug walay lipud-lipod nga niangkon nga mogamit og ilegal nga drugas ang apo apan dako iyang kaguol kay wala lang unta kini gipatay , mosugot ra siya bisan gipriso nalang unta kini.
Gipadayag sa apohan nga bisan nagbisyo iyang apo, giisip niya nga biktima ra usab kini sa kahigayonan ilabi na sa ilang dapit namungingi sa kadaghan ang mga tiggamitan og ilegal nga drugas.
Ang apohan nanawagan og hustisya para sa iyang apo ug niawhag sa naghimo sa krimen nga mopatim-aw nalang og atubangon ang gihimo nila nga salaod.
Gitug-an ni Diaz, may kalabutan sa ginadili nga drugas ang ilang gitutukan human adunay nakuha ang SOCO Team nga mga ginadiling drugas ug kagamitan sa paggamit sa ginadiling drugas gikan sa biktima.
Upat ka basiyo ug duha ka slugs sa bala sa kalibre 45 ang nakuha sa crime scene nga maoy gituohan gigamit sa pagpusil sa biktima.
Padayon ang backtracking karon sa kapulisan aron aduna silay makuha nga CCTV ilabi na ang maong dapit diin nahitabo ang pagpamusil sudlonon kaayo nga bahin.
Ang kapulisan padayon sa ilang imbestigasyon may kalabutan sa gipatay human kini giingong nga napriso na kanhi apan wala nila masayri ni Diaz kung sa unsa nga kaso. IBM BANAT NEWS