CEBU, Philippines — Ang Commission on Elections (Comelec) sa Rehiyon 7 nitala og kinatibuk-ang 4,753,563 ka mga botante sa Central Visayas nga mobotar sa umaabot nga local ug national elections sunog tuig.
Matud ni Comelec 7 assistant regional election director Atty. Veronico G. Petalcorin nga ang Cebu maoy nag-una sa rehiyon nga adunay 3,702,363 ka rehistradong botante ug dunay 9,443 ka clustered precincts. Samtang sa Bohol adunay 1,051,200 ka rehistradong botante ug 3,069 ka clustered precincts.
Nagkanayon si Petalcorin nga adunay dakong pagsaka sa gidaghanon sa mga botante sa Sugbo kon itandi sa miaging mga tuig, ug tungod kini sa natural nga pagtubo sa populasyon ug migration tungod sa mga opurtunidad sa pagpanarbaho.
Sa laing bahin sumala sa iyang report, gikan Oct. 1 ngadto sa 8, nakatala sila og 2,401 ka indibidwal sa Central Visayas nga naka-file og Certificates of Candidacy (COC).
Sa kinatibuk-an 1,265 ang gikan sa Cebu diin 993 ang lalaki ug 272 ang babaye. Samtang 1,136 gikan sa Bohol diin 859 ang lalaki ug 277 ang babaye nga nagtinguha sa lainlaing mga posisyon sa eleksyon.
Gawas niana, gipadayag niya ang mga inisyatiba sa pagpalambo sa voter registration access, nga naglakip sa satellite registrations ug Register Anywhere Program (RAP).
Sa unang bahin sa 2024, ang Sugbo nihimo og 841 ka satellite registration ug 455 sa Bohol, samtang ang RAP miproseso og 2,851 ka indibidwal sa Cebu ug 108 sa Bohol. Alang sa pag-isyu og voter certification, niabot sa 71,215 ang naapod-apod sa Sugbo ug 19,145 sa Bohol.
Matud pa niya nga ang information campaign sa Comelec nakahatag og gahum sa mga huyang nga sektor, diin 98 porsyento sa mga tumong sa pagpangandam ang nakab-ot na. Kini nagpasalig nga ang rehiyon andam na sa umaabot nga eleksyon. MEL BANAT NEWS