CEBU, Philippines — Gihimo sa buhatan sa Department of Environment and Natural Resources (DENR) pinaagi ni undersecretary Rochelle Gamboa ang pagsusi sa tukoron nga boardwalk sa Isla sa Olango sa siyudad sa Lapu-Lapu.
Si DENR Undersecretary Gamboa ang gikuyogan ni Lapu-Lapu City Mayor Junard "Ahong" Chan sa pagsusi sa dapit nga tukoran sa maong proyekto.
Mikuyog sa gihimong on-site inspection ang representante sa DENR 6th District Engineering Office, City Environment and Natural Resources Office, Protected Area Management Board, ug ang City Engineering Office uban ang staff ni Congresswoman Cindi King-Chan, Barangay Officials sa Pangan-an ug San Vicente. Ang pag inspection sa DENR gitumong aron pagseguro nga dili maapektohan ang protected mangroves area sa Barangay Pangan-an ug Barangay Sabang ug San Vicente diin anaa usab ang Bird Sanctuary.
Sa nasayran niadto pang Abril gipahigayon ang proyekto nga gipasiugdahan ni Kongresista Chan apan nalangan ang pagpatuman niini kay gipaabot ang pagtugot gikan sa DENR sanglit posible nga dunay maapektohan nga protected mangroves area.
Hinuon, si Barangay Kapitan Junrey Casiao sa Pangan-an ang mipadayag nga adunay pipila ka mga molopyo sa maong dapit nga gikahinabi ni USEC Gamboa diin giasoy ang kalisod sa agi-anan gikan sa islet sa Pangan-an paingon sa Barangay Sabang nga sakop sa mainland sa Isla sa Olango.
Dugang gibutyag sa mga molopyo nga dunay mabdos nga naahat og panganak sa mangroves area tungod sa kalisod sa agi-anan diin dili maagian kon motaob kay lapawan sa tubig ang agi-anan.
Matud ni Casiao nga si Usec Gamboa mismo ang nakasinati sa kalisud sa agi-anan tungod kay dul-an sa usa ka oras ang paglakaw subay sa lugar nga tukoran sa boardwalk project.
" Nalipay ko nga si Usec Gamboa mismo naka experience sa kalisod sa agi-anan. Hopefully, mo okey na ang DENR sa proyekto, " suma pa ni Casiao. MEL BANAT NEWS