27 ka baboy gipabalik sa Isla sa Camotes
CEBU, Philippines — Wala makaabot sa ilang padulngan ang 27 ka baboy nga gisakay og motorized banca gikan sa Barangay Esperanza, Lungsod sa San Francisco, Isla sa Camotes human kini gipugngan sa Cebu Maritime Police Station sa kabaybayonan sa Cogon East, Lungsod sa Carmen niadtong Martes sa kadlawon gumikan kay walay mga dokumento.
Base sa taho sa Cebu Maritime Police Station ilang giaksiyonan ang impormasyon nga ilang nadawat nga gikan sa CBIN kalabot sa pag-transport sa giingong undocumented livestock products nga gisakay og puti nga kolor nga motorized banca nga adunay marka nga "Two Sisters" diin nidunggo kini sa baybayon sa Cogon East, Lungsod sa Carmen.
Pag-abot sa responding officers diha sa dapit nakita nila ang 27 ka baboy ug nasuta nga gikan kini sa Barangay Esperanza, San Francisco, Isla sa Camotes.
Sakay usab sa maong bangka sila si Armando Amurillo, 60-anyos, minyo ug Carlos Pregruer, 38-anyos, ang duha pulos nagpuyo sa Barangay Esperanza.
Ang mga baboy temporaryong gi-hold human wala makapakita og dokumento sila si Amurillo ug Pregruer sa ilang pag-transport sa mga baboy.
Nasayran nga ang mga baboy gitugyan ngadto sa Carmen Municipal Agriculture Office alang sa proper disposition.
Apan gibalik ngadto sa mga crew ang mga baboy ug gipapauli sila ngadto sa ilang lugar human ang Municipal Agriculture Office niisyu og certificate of return to sender of apprehended live hogs ug wala usab sila gikasohan.
Sayo pa, si Cebu Governor Gwendolyn Garcia niluwat sa Executive Order No. 16, Series of 2024 nga nag-establisar sa Anti-Smuggling Inter-Agency Task Force sa Probinsiya sa Sugbo. BDB BANAT NEWS
- Latest
