Riprap sa barangay paknaan gikabalak-an nga mahugno

CEBU, Philippines — Gikabalak-an sa mga molopyo sa Zone Ahos sa Barangay Paknaan siyudad sa Mandaue ang nagpadayon nga pagtrabaho sa riprap nga nagsubay sa daplin sa Butuanon River nga gipatuman sa Department of Public Works and Highways.

Suma pa ni Ely Coming ang presidente sa homeowners` association nga nabalaka sila nga dili lig-on ang pagka trabaho sa maong riprap ug posibleng mahugno kini.

Nisamot ang ilang kabalaka human nasayran nga nahugno ang susamang flood control project diha sa Butuanon River sa habig nga bahin sa Barangay Maguikay.

Nagkanayon si Coming nga ilang nasuta nga wala butangi og kabilya ang ubos nga bahin ug ibabaw lang nga bahin ang gibutangan og kabilya nga tunga sa metros ang gihabogon. 

"Para namo mura man ni og dili riprap kay mura man ni og habog nga paril nga dili na hinuon mi makakita sa tubig ug sa mga ilegal nga pagahimoon sa luyo sa habog nga paril," segun pa ni Coming.                                      

Si Alexander Bacalso nga maoy foreman sa usa ka construction firm nga nagtrabaho sa maong proyekto ang miangkon usab nga walay kabilya sa ubos nga bahin apan iyang gipaniguro ang kalig-on niini ug dili kini madali sa pagkahugno.  MEL BANAT NEWS