CEBU, Philippines — Ang Severe Tropical Storm Marce nahimo nang usa ka bagyo Martes sa buntag, matud sa Philippine Atmospheric, Geophysical, and Astronomical Services Administration (PAGASA).
Ang bagyo nikusog gamay ibabaw nga bahin sa Philippine Sea, diin ang sentro niini nahimutang sa 480 kilometros silangan sa Echague, Isabela, ug kasamtangang nagdala sa hangin nga 130 kilometros matag oras nagpaingon sa amihanan-kasadpan nga adunay gikusgon nga 25 kph.
Ang pinakaulahing Tropical Cyclone Bulletin #7 sa PAGASA, nga gipagawas alas 5:00 sa hapon kagahapong adlawa, nagpasidaan sa posibleng mga kadaot samtang si Marce nagkaduol sa yuta.
Kagahapon, nipaingon kini sa kasadpan- amihanang kasadpan ug karon Nobiyembre 6 gibananabana nga mao gihapon ang lihok niini sa dili pa mohinay ug moliko paingon sa kasadpan ibabaw sa Philippine Sea sa silangan sa Extreme Northern Luzon.
Gipaabot nga magpadayon ang pagkusog niini sa dili pa motugpa sa Babuyan Islands o amihanang bahin sa Cagayan sa Huwebes sa hapon o gabii, Nobyembre 7.
Giisa na ang Tropical Cyclone Wind Signal No. 1 sa Batanes, Cagayan lakip ang Babuyan Islands, Ilocos Norte, Ilocos Sur, Apayao, Abra, Kalinga, Mountain Province, Ifugao, ang amihanang bahin sa Benguet, Isabela, Nueva Vizcaya , Quirino, ug ang amihanang bahin sa Aurora diin ang hangin mahimong moabot sa 39-61 km/h sa mosunod nga 36 ka oras ug gipaabot ang kusog nga pag-ulan ug hangin.
Gibanabana sa PAGASA nga mogawas sa Philippine Area of Responsibility (PAR) sa Biyernes sa hapon o gabii ang bagyong Marce. IBM BANAT NEWS