CEBU, Philippines — Patay ang usa ka motorista nga nabanggaan sa nagsunod kaniya nga Ceres Bus diha sa National Highway sa Barangay Cotcot, Lungsod sa Liloan alas-4 pasado sa Lunes sa hapon.
Ang kapolisan nga gipangulohan ni Plolice Major Charlie Santiago, hepe sa Liloan Police Station miila sa biktima nga mao si Romel Arellano Montecalvo, 47, taga Riverside sa Barangay Canduman, Siyudad sa Mandaue.
Samtang ang nakadasmag kaniya mao ang Ceres Bus nga gimanehos ni Violito Caday Salgarino, 39, taga Barangay Tabok sa Siyudad sa Mandaue.
Sa imbestigasyon sa kapolisan sakay ang biktima sa iyang motor padung sa direksyon sa Mandauce City, samtang nagsunod sab niya ang maong bus.
Apan pag-abot sa nahitabo, gikatahong nabanggaanan niini ang biktim hinungdan sa sarasay niini sa karsada ug napasok sa ilawom sa maong bus nga nakaingon sa hinanaling kamatayon niini.
Sa pikas bahin, nanawagan ang Talisay City Council sa Department of Public Works and Highways nga i-prioritize ang mga accident prone areas nga mabutangan og safety signages, human usa ka 23-anyos nga motorista namatay human nahulog sa pangpang sa Barangay Campo 4 sa Dakbayan sa Talisay sa nilabay nga semana.
Usa sa gitan-aw nga kinahanglan mapaayo na dayon, ang naguba nga gutter sa kilid sa dalan aron makatabang nga maalihan ang mga tawo o sakyanan nga mahulog sa pangpang.
Sumala pa ni Talisay City Councilor Danny Caballero ang Chairman sa Committee on Disaster Resiliency nga kinahanglang ayuhon kini sa DPWH ug butangan og traffic safety signages aron mapasidan-an ang mga motorista.
Niadtong Nobiyembre 1, 2024 usa ka 23-anyos nga lalaki nga nagmotorsiklo ang patay na nga napalgan sa ubos duol sa sapa human kini nahagbong sa pangpang sa Barangay Campo 4 nga adunay giladmon nga 100 feet.
Si Caballero, nipahimangnu sa mga motorista nga magmabinantayon sa pag-agi sa bukirang barangay sa dakbayan ilabi sa Manipis-Toledo Road tungod sa kanunay nga pag-usab-usab sa panahon diin adunay kalit-kalit nga pag-uwan. Rowena D. Capistrano/IBM BANAT NEWS