Bata natusok sa kabilya

CEBU, Philippines — Usa ka 12-anyos nga batang lalaki ang gitabang sa kabomberohan human kini natusok og puthaw nga dunay sima diha sa iyang bukton ibabaw sap aril nga iyang gikatkat diha sa Sitio Alceka, Barangay Calamba, siyudad sa Sugbo pasado alas 4 sa hapon niadtong Lunes, Nobiyembre 4, 2024.

Ang biktima residente ra sab sa naasoy nga lugar ug usa ka grade 5 student nga nalandig karon sa Vicente Sotto Memorial Medical Center.

Usa sa nakakita sa panghitabo mao si Gerald Generana, silingan niini nga miingon nga nagtakyan ang bata kauban sa laing duha ka mga kaduwa niini.

Una niini, nasangit ang takyan sa atop ug dali ra kining gisaka sa bata agi sa sementadong koral nga dunay grill fence nga dunay tinalinsang sima sa ibabaw, apan wala siya sa maunsa.

Apan sa dihang niburak ang bata sa takyan ang sapatos na sab niini ang nalagpot ug nasangit sa mao gihapong atop maong nikatkat na sab kini pag-usab apan didto na nahitabo ang disgrasya.

Nakuha sa bata ang iyahang sapatos apan sa pagnaog niini natipak ang kilid sa koral nga iyang gitumban hinungdan nga kini na-slide maong nigakos siya sa puthaw apan natusok siya sa maong puthaw nga nilapos sa abaga niini. Gidagan dayon nila ang bata dihang nasyagit kini sa kasakit samtang nasablay sa maong puthaw. Gikugos nila ang bata ug ilaha untang ibton ang nitusok nga puthaw apan dili maibot kay dunay sima.

"Mao ‘to kuha mig hagdanan unya amo siyang gipa relax, isog-isog bataa kay wala man mohilak, nikatawa pa gani," sigon ni Generana.

Nanawag dayon sila sa barangay nga dali sab ni contact og bombero.  Hapit pa magduha ka oras una nakuha ang bata tungod kay giputol nalang ang kilid sa puthaw kay kun tandugon sakitan naman kini.

"Pag-abot sa (fire) gi-oxygen siya, gi-dextrose samtang gabitay siya," dugang ni Generana.

Ang uyoan sa bata nga si Homer Abellana nga delivery rider, mibutyag nga gitawagan nalang siya ug gipahibawo sa nahitabo sa iyahang pag-umangkon.

Nasayran nga sila'y nagbantay sa bata kay ang inahan niini nga iyang igsuon toa sa Manila nanarbaho samtang ang amahan sa bata giingong wala ra magpakabana.

Nanawagan kini og tabang ilabi na sa siyudad sa Sugbo nga matabangan sila ilabi na sa igasto pagpalit og tambal.

"Matabangan mi nila bisag gamay lang nga financial mga tambal, mga lihok kay gihilantan (biktima)," panawagan ni Abellana.

Nasayran nga ang dapit diin nagduwa og takyan ang mga bata mao gyuy lugar nga anha magduwa ang mga bata sa ilang dapit.

 Ang Department of Social Welfare and Services sa dakbayan mosusi kun unsay matabang sa siyudad sa bata.  IBM BANAT NEWS