CEBU, Philippines — Gipanglantawan ang pagsirado na usab sa Cebu City Sports Center (CCSC) human ang pagrekomendar sa immediate repair sa track oval aron mahuman kini panahon sa pagsaulog sa Sinulog 2025 diin ang maong lugar maoy gamiton isip primary venue.
Kagahapon si Konsehal Jerry Guardo, chairman sa Committee on Infrastructure sa konseho sa siyudad nangulo sa pag-inspection sa CCSC track oval uban sa CCSC Manager Jovito Taburada ug pipila ka sakop sa Department of Engineering and Public Works (DEPW).
Kini human nipahibawo si Cebu City Mayor Raymond Alvin Garcia nga magsalig siya sa rekomendasyon sa konseho kabahin sa pag-ayo sa CCSC.
Atol sa inspection, ang team ni Guardo nilibot sa track oval ug gisusi ang mga damage nga nakita.
Gisusi usab nila ang mga materiyales apil ang kalig-on sa pagkapilit sa salog sa track oval.
Nakita nga mas daghang kadaot ang nakita sa tuo nga bahin nga nag-atubang sa grandstand.
Human sa inspection girekomendar ni Guardo ang pagpadali sa rehabilitasyon sa track oval.
Nihatag usab siya sa posibleng konsiderahon sa kinatibuk-ang pag-ilis sa track oval apan magdepende usab kini sa desisyon sa mayor.
Matud ni Guardo nga si Shaun Doherty, tag-iya sa SBD Builders nipadayag sa ilang tinguha nga i-refurbish ang 60 porsyento sa kinatibuk-ang track oval.
"Pag check namo didto. nang burot napod. But not like diri (right side) nga grabe na gyud kaayo, ning bakbak na gyud ang rubber", paghulagway ni Guardo.
Si Guardo nagkanayon nga kinahanglan nilang tan-awon ang asphalt overlay o ang layer sa sa dili pa rubber aron makita usab kong tupong ba ang pagbutang niini.
Giingong mao usab kini ang gikabalak-an ni Konsehal Joy Young kinsa maoy nagdumala sa unang rehabilitasyon sa track oval niadto pang tuig 1994.
Sa argumento ni Doherty nga dili unta makompromiso ang surface sa track oval kong wala pa ang mga cultural events.
si Guardo nagkanayon nga ang lugar nga naagian atol sa pag-andam sa mga kalihokan anaa ra sa tuong bahin atubangan sa grandstand ug pipila ka bahin sa track oval gitabonan pa og plywood aron maprotektahan kini. BDB BANAT NEWS