Konseho mosusi sa CCSC pagsuta sa kahimtang sa track oval
CEBU, Philippines — Mohimo og inspeksyon ang pangu sa Committee on Infrastructure nga si Konsehal Jerry Guardo karong adlawa, Nobyembre 5, 2024, uban ang SBD Builders sa Cebu City Sports Center aron masuta ang kondisyon sa track oval.
Si Cebu City mayor Raymond Alvin Garcia nipahibawo niini atol sa press conference kagahapon.
Gitug-an ni Garcia nga nagtagbo na sila sa SBD Builders aron sabutan ang pag-ayo sa track oval ug nauyonan nga himoon kini sa Oktubre apan nalangay kini tungod kay wa dayon moabot ang mga materyales.
Nihangyo ang SBD Builders kaniya nga sugdan ang pag-repair sa nangaguba nga parte sa track oval karong buwana apan mibahad na ang mayor nga kinahanglan nga humanon na gyud nila ang ilang trabaho kay kun dili, pulihan na kini niya.
Karon nga miabot na sa konseho ang maong problema kabahin sa CCSC diin ni-rekomenda si Konsehal Joy Augustus Go Young nga sugdan nalang ang pag-ayo sa CCSC human sa Sinulog.
“Karon nga naapsan ug nihangyo na ang City Council nga to let them see it and to also let them keep the recommendations, ako, I am obliged kay City Council na gud na ang nihangyo nako. So, we will wait for their recommendation if ato ba gyud ning ipadayon inig November”, suma pa sa Mayor.
Malaumon si Garcia nga unta mahuman na ang pag-repair sa track oval sa dili pa matapos ang tuig ug dili na paabton pa human sa Sinulog.
“Ang ako lang ani, I will wait for the recommendation from the city council, but personally, dili nako gusto nga mohuwat pa sa Sinulog because it has been long overdue and it has been delayed for so long”, suma pa ni Garcia.
Samtang kampante gihapon si Garcia nga ipahigayon ang Sinulog 2025 sa Cebu City Sports Center. (BANAT NEWS)
- Latest
