CEBU, Philippines — Usa ka memorandum of understanding (MOU) kon kasabotan ang gipirmahan tali ni Gobernador Gwendolyn Garcia ug Professor Li Candong, ang Presidente sa Fujian University of Traditional Chinese Medicine (FUTCM) atol sa culmination o pagtapos sa upat ka adlaw nga pagbisita sa delegasyon sa Sugbo ngadto sa Fujian, China.
Ang maong kasabotan alang kini sa umaabot nga kolaborasyon tali sa Probinsya sa Sugbo ug sa mga eksperto sa FUTCM kalabot sa tradisyonal nga pagpanambal sa Chinese.
Sumala sa Capitol Information Office, atol sa inisyal nga dayalogo tali sa Probinsya sa Sugbo ug sa FUTCM, didto sa unibersidad sa Foszhuo City, gidapit ni Garcia ang mga opisyal ug propesor sa FUCTM nga mobisita sa Sugbo ug mopaambit sa ilang kaalam ug kahibalo sa praktis sa traditional Chinese medicine ngadto sa mga Pilipino nga medical practitioners.
Subay niini, usa ka health summit ang ipahigayon sa Sugbo kon diin adunay pagpinirmahanay og "cooperation agreement" sa umaabot nga mga bulan.
Atol sa pagbisita sa sobra 30 ka delegasyon sa Sugbo gipangulohan ni Garcia didto sa China, apil sa gibisita sa gobernador uban sa mga bokal ug doktor sa Vicente Sotto Memorial Medical Center (VSMMC) ang museum sa Fujian University of Traditional Chinese Medicine.
Sa maong museo, makita ang tradisyonal ug kasaysayan sa praktis sa tradisyonal nga pagpanambal niadto pang 1,100 BCE.
Ang mga opisyal sa Sugbo nakigdayaglogo usab sa mga eksperto sa medikal sa FUTCM kalabot sa pag-apil sa komprehensibong kaalam o kahibalo sa praktis sa traditional Chinese medicine sa Alternative Health Care system sa Sugbo nga usa sa adbokasiya ni gobernador Garcia. (BANAT NEWS)