CEBU, Philippines — Mitingog na si Cebu City Mayor Raymond Alvin Garcia kabahin sa paghingan ni dismissed mayor Michael Rama nga siya usa ka mananapaw human kini milingkod isip mayor sa syudad niadtong Oktubre.
“Dili na gyud ko ganahan nga mo-react kay until now, I still have a very high respect niya ug I still consider him a friend. Sa maayong pamatasan, dili nalang gyud ko mo-react especially if he is an elder”, pamahayag ni Garcia.
Gisaysay ni Garcia nga ang iyang paghulip ni Rama isip mayor sa dakbayan iya lang gisunod ug gituman ang unsay giingon sa balaod. Ang iyang pagkamayor adunay pagtugot sa Department of the Interior and Local Government.
Sa press conference kagahapon, gitug-an ni Garcia nga nakabasa gyud siya sa mga mantalaan kabahin sa plano ni Rama nga mopasaka og kaso batok kaniya ug siya miingon nga iya usab kining katungod.
Malaumon si Garcia nga unta makakuha og maayo nga “advice” si Rama gikan sa iyang mga legal team kun angayan ba gyud nga pasakaan siya og kaso.
Gihimakak usab ni Garcia ang mga pasangil ni Rama nga siya maoy namuno sa mga dili makatarunganon nga pagtratar niini human nga nahukman sa Ombudsman nga wala na kini katungod nga mobalik og pangalagad sa kagamhanan.
Una niini gitug-an ni Rama nga gitangtangan siya og detailed police escort.
Matapos na ang unom ka buwan nga suspension order ni Rama karong Nobiyembre 10 ug adunay hugon-hugon nga mobalik kini sa City Hall karong Nobiyembre 11. (BANAT NEWS)