CEBU, Philippines — Human sa “generally peaceful” nga pag-obserbar sa Kalag-Kalag 2024, usa ka ordinansahon ang planong iduso aron manawagan sa Cebu City Government nga iapil ang mga nagpuyo sa sulod sa mga sam-ang sa mga long-term nga plano sa pagtukod og socialized housing.
Lakip sa padayong gikabalak-an sa Cebu City Government atol sa pag-obserbar sa Kalag-Kalag mao ang mga settlers o kadtong mga pamilyang diha nagpuyo sa sud sa mga sam-ang.
Matud ni Konsehal Philip Zafra, Chairman sa Committee on Peace and Order sa Cebu City Council, sa paglabay sa katuigan nakat-on na kining mga informal settlers nga mga coexist kauban sa mga minatay.
Matud niya, padayon pa sila sa proseso sa koordinasyon sa mga tagdumala sa matag sementeryo alang sa ilang pagpahawa ug pagbalhin og relokasyon.
Hinuon matag panahon sa kalagkalag boluntaryo silang mobiya ug mamalik lang ini og human na ang okasyon.
Matud ni Zafra kinahanglang matagad ug iapil sa housing program sa dakbayan.
Matud niya, dili maayo alang sa mga pamilya nga magpadako sa ilang mga anak sulod sa sementeryo sa tibuok nilang kinabuhi.
“Pero mao lagi na siya sa kakuwang pud sa atong kaigsuonan ug sa programa sa atong gobiyerno naay pipila sa atong mga kaigsuonan nga way laing kadangpan…wa sad mabadlong sa management, wa sad dayon matabangan sa gobiyerno so didto na intawon sila nagpuyo,” matud pa ni Zafra. Nanawagan si Zafra sa kagamhanan ilabina sa Division for the Welfare of the Urban Poor (DWUP) nga iapil ang mga namuyo sa samg-ang sa mga socialized housing programs sa dakbayan nunot sa giduso sa dakbayan sa pagtukod og Medium Rise Building (MRB).
“So hopefully, kani sila, malakip, gawas atong mga naapil sa three-meter-easement zone sa mga sapa og uban pa, iapil sad tawon nato ni sila aron mapahiluna na intawon and eventually, ato jung ma preserve ang resting place sa atong mga mahal sa kinabuhi,” ni Zafra. — /IBM (BANAT NEWS)