Kapin 38 toneladang basura nakolekta

CEBU, Philippines — Moabot dili mominos 38.46 ka tonelada nga basura ang nakolekta sa Department of Public Services (DPS) alang sa kinatibuk-ang pag-obserbar sa Kalag-Kalag 2024 nga naglakip sa round up gikan Oktubre 31 hangtod Nobiyembre 1 ug 2.

Kini matud sa Cebu City Public Information Office (PIO) head, Ramil Ayuman.

Ang mga basura naglakip sa mga plastic bags, food packs, mga sachet sa mga tsitseriya, mga botelya, plastic bottles, mga papel, karton ug daghan pang uban nga gipamiyaan sa mga niduaw sa mga sam-ang.

Ang kadaghanan hinuon niini nakolekta gikan sa mga gipahimutang nga basurahan sa sud ug gawas sa mga sam-ang.

Nabantayan nga daghang mga sakop sa Barangay Environmental Officers (BEOs), PROBE, Task Force Kasaligan , ug CESET nga gi-deploy sa sud sa mga sam-ang aron mamadlong ug moisyu og tiket niadtong magpataka og labay og mga basura diha sa mga sam-ang, manigarilyo ug uban pang gidili/

Sumala pa sa Cebu City PIO, ang DPS nakakolekta sa pinakadaghang basura sa Calamba Cemetery nga adunay 9.6 ka tonelada.

Gisundan kini sa pagkolekta sa basura gikan sa Queens City Cemetery nga adunay 4.8 tonelada nga basura ug Carreta Cemetery nga adunay 3.8 tonelada. –/IBM (BANAT NEWS)