Systematic nga paagi pagsulbad sa krisis sa basura gitinguha

CEBU, Philippines — Gipanglantawan karon sa konseho sa dakbayan sa Sugbo ang pagpahigayon og summit aron hisgotan ang mga scientific ug systematic nga pamaagi sa pagsulbad sa krisis sa basura sa dakbayan.

Sa pakighinabi kang Konsehal Rey Gealon, ang proponent sa resolusyon, kagahapon (Domingo), siya miingon nga naggumikan kini sa lapad nga mga kalapasan sa mandato nga nalatid sa RA 9003. Siya nidugang nga mao kini ang rason nganong gikinahanglan ang pagpahigayon og summit aron tigumon ang tanang stakeholders aron makahimo og “scientific and systematic approach” sa pagsulbad sa krisis sa basura.

Hinuon iyang giklaro nga ang garbage disposal sa dakbayan anaa pa sa “manageable” level apan giangkon nga nagkinahanglan og “agresibo” nga tubag sa bahin sa segregation sa matag panimalay.

Girekomendar usab ni Gealon ang pagtukod og Materials Recovery Facility (MRF) alang sa koleksyon gikan sa mga barangay.

Nahibaw-an segun sa report sa COA nga ang Dakbayan sa Sugbo wala mogamit sa mga composting facilities nga nahimutang sa Barangay Taptap ug Basak Pardo, nga nagkantidad og P1.9 milyones ug P1.4 milyones.

Wala usab magamit ang mga MRF nga nahimutang sa Barangay Taptap, Basak Pardo, ug Kalunasan.

Dugang pa ni Gealon nga ang COA findings nagkanayon nga kinahanglan pa nga hingpit nga ipatuman sa siyudad ang 2011 nga grant gikan sa Department of the Interior and Local Government (DILG), nga mokabat sa P53 milyones aron matukod ang tulo ka MRF.

Niini, girekomendar ni Gealon nga awhagon ang Cebu City Environment and Natural Resources Office (CCENRO) sa paghimo og solid waste management summit aron pagtapok sa mga opisyal sa gobyerno ug pribadong stakeholders.

Sa laing giaprobahan nga resolusyon nga gisang-at ni Gealon, ang CCENRO gihangyo usab nga magtukod ug “ideally fully functional MRF” aron sundon sa mga barangay.

Ang CCENRO gimandoan sa pagsumite sa usa ka detalyado nga plano ug aksyon sulod sa 30 ka adlaw.

Gihangyo usab ang Association of Barangay Councils (ABC) sa paghatag og technical ug financial assistance sa tanang barangay. —/MEL (BANAT NEWS)