CEBU, Philippines — Gipasalig ni Cebu City Mayor Raymond Alvin Garcia nga makadawat na pagbalik ang mga senior citizen sa ilang maintenance medicine sugod karong Enero 2025.
Sa report sa Cebu City News and Information, matud pa ni Garcia atol sa Barangay Assembly Day sa Barangay Tinago nga ang budget sa maintenance medicine lakip na kini sa budget sa kagamhanan sa sunod tuig.
“Mao na nga sunod tuig, mosaad ko kaninyo atong gibutang sa budget nga next year, January, magsugod na ta og hatag og everyday maintenance medicine sa atoang mga kaigsoonan unya mo ingon dayon si maam, ‘’Di na ta mamalit’,” nagkanayon siya. Tumong ni Garcia nga ibalik ang paghatag og maintenance medicines alang sa mga senior citizen tungod kay sa pipila ka buwan nga binisita niya sa nagkadaiyang barangay sa syudad, adunay mga moduol ug mangutana gyud niya kun nganong naundang ang programa sa pagpanghatag og maintenance medicine alang sa mga senior citizens.
Dugang maayong balita alang sa mga senior citizen mao ang mamahimo na sab sila nga makadawat sa ilang binuwan nga ayuda alang sa mga buwan sa Oktubre, Nobiyembre, ug Disyembre sugod sa unang semana sa Disyembre. —/MEL (BANAT NEWS)