Usa ka tunghaan sa siyudad sa Lapu-Lapu gi-padlocked

CEBU, Philippines —  Gikandadohan ang usa ka eskwelahan sa Barangay Pajac, Lapu-Lapu City samtang na-trap ang lady guard niini nga nag duty sa maong higayona.

Kini nahitabo human ang giingong mga sumusunod ni Marciano Alegres midesisyon nga i-lock ang gate sa Abuno Elementary School niadtong Biyernes sa buntag, Nobyembre 1, 2024.

Giangkon sa pamilyang Alegres nga ang usa ka ektaryang yuta nga gibutangan sa eskwelahan usa ka pribadong yuta nga sila ang nanag-iya

Nakahinabi sa Banat News si Noel Alegres Cosep nga mao ang nagpadlock sa eskwelahan ug miingon nga napugos sila nga kandadohan ang mga gate tungod kay wala tagda sa Kagamhanan sa Lapu-Lapu City ang ilang mga hangyo."Kaming tanang mga heirs ni Marciano, nagkahiusa mi tungod kay gibalewala ang among hangyo diha sa syudad sa Lapu-Lapu. Wala nila gihatagan og gibug-aton," matud ni Cosep.

Sa pikas bahin, miingon si Lapu-Lapu City Mayor Junard "Ahong" Chan nga ang city government adunay deed of donation nga nanotaryohan niadtong 1966, ug adunay resolusyon nga gipirmahan niadtong kanhi Mayor Mariano Dimataga diin nagsulti nga ang yuta gidonar na sa gobyerno.

Giingon usab ni Chan nga ang Department of Education (DepEd) Lapu-Lapu City Division adunay dokumento nga nagpamatuod nga ang yuta iya na sa gobyerno.

Matud ni Chan nga ang pamilyang nag-angkon sa yuta kinahanglan nga mag-agi sa legal nga proseso aron masuta kung kinsa gayud ang tinuod nga tag-iya sa yuta imbis nga magpadlock sa eskwelahan.

"So dapat ipaagi og husgado aron mahukman kung kinsa ba gyud ang tag-iya. Dili kay ingon ani nga paagi nga padlockan. Aduna kitay husgado nga atong tahuron ug respitohon," dugang pa ni Chan.

Mipasumbingay si Chan nga nag-demand ang pamilyang Alegres nga bayran ang yuta sa gobyerno, apan wala pa sila makadawat og court decision aron mobayad.

"Di man ta kabayad og walay court order. Dugay naman gigamit ang eskwelahan, ang atoa lang kung ang korte modesisyon nga kinahanglan bayran sila, obligar ang syudad," pasabot ni Chan.Samtang, giingon usab ni Cosep nga nagsumiter sila og duha ka sulat ngadto sa city government, ang una niadtong Septiyembre aron mangayo og meeting uban ang kapin 100 ka mga sumusunod ni Marciano Alegres.

Tungod kay wala sila makadawat og tubag, ilang gisundan og ikaduha nga sulat nga ipasirado na ang maong eskwelahan.

"Nagpaabot lang unta mi nga magpa-open forum ang gobyerno, ang mayor ug mga konseho nga maminaw mi sa duha ka side," matod ni Cosep.

Apan gihimakak ni Chan ang alegasyon ni Cosep nga wala wa sila hatagi og pagtagad.

Mitug-an si Chan nga nakadawat sila og mga sulat gikan sa pamilya og gihimo ang meeting uban si Atty. James Allan Sayson sa Lapu-Lapu City ug uban pang mga abogado sa DepEd ug sa mga Alegres.Sumala ni Cosep, ang lalis nagpalibot sa legitimacy sa 20-anyos nga Deed of Donation nga gi-pirmahan ni Fructoso Fuentes nga wala koneksyon sa pamilya Alegres. Ang pamilyang Alegres nakakuha og Transfer Certificate of Title (TCT) nga nagngalan kang Marciano Alegres niadtong 2017.

Matod ni Cosep, nakig-coordinate na usab sila sa DepEd ug sa mga legal nga eksperto aron ma-assess ang sunod nilang lakang.

Sa laing interview, si Pajac Barangay Captain Bonifacion Ompad Jr. mitug-an nga alas 9:37 sa buntag niadto si Cosep ug pito ka kauban aron ipa-lock ang eskwelahan. Apan wala niya giablihan ang gate bisan pa sa hangyo sa mga opisyal.Ang kapitan sa barangay miingon nga si Cosep ug ang iyang pito ka kauban, giingnan ang lady guard nga pwede siya mogawas sa wala pa nila ikandado ang gate. Apan, ang lady guard midumili ug gawas kay nag-duty pa man siya sa maong oras.Hangtod alas 5 sa hapon kagahapon, Nobyembre 2, nakapadlock gihapon ang main gate sa Abuno Elementary School. Si Ompad Jr. midugang usab nga mihuwat siya hangtod alas 6 sa hapon sa Biyernes, ang katapusan sa duty sa lady guard, apan wala gyud moabot si Cosep sa lugar. Tungod niini, napugos siya nga gubaon ang padlock sa usa ka gate nga gi-kandado nila sa kilid sa main gate aron makagawas ang lady guard.Sa laing bahin, ang abogado sa DepEd Lapu-Lapu City Division nga si Atty. Mai Ruñez, miingon nga sa Lunes, mag-set sila ug miting kauban ang City Legal Head nga si Atty. James Allan Sayson aron hisgotan ang necessary nga mosyon sa korte alang sa pag-abli sa gate.Giingon ni Ruñez nga plano nilang mag-file ug posible nga kaso batok kang Cosep ug sa uban nga nalambigit para sa grave coercion.