Retired baranmgay officials makadawat sa ilang gratuity pay sunod tuig
CEBU, Philippines — Gipasaligan ni Cebu City mayor Raymond Alvin Garcia nga makadawat sa ilang gratuity pay ang mga retired barangay officials sa dakbayan sa Sugbo.
Suma pa ni Garcia nga posibleng madawat ang gratuity pay sa mga retired barangay officials sunod tuig.
Ang maong pasalig iyang giluwatan atol sa ilang general assembly diha sa barangay Sawang Calero.
Segun sa report sa Cebu City PIO apil sa gisaaran sa mayor ang Sangguniang Kabataan nga usbawan ang ilang pundo sunod tuig.
Nagkanayon si Garcia nga aduna nay ordinansa kabahin niini ang iyang naumol alang sa matinud-anon nga pagserbisyo sa mga barangay officials ug tinguha niya nga mapatuman na kini karon.
Base sa City ordinance, ang retired barangay captains modawat og P5 thousand samtang ang matag councilman modawat og tag P3,000 sa matag tuig nga serbisyo.
Gipahibawo usab ni Garcia nga iyang dugangan ang financial assistance sa Sangguniang Kabataan (SK).
Ang SKs sa matag barangays midawat og tag P1 million ug plano niya nga sa sunod tuig himoon kini nga P1.5 ngadto sa P2 million.
Gawas niana gipahibawo usab ni Garcia nga ang honorarium-based workers sa matag barangay ang makadawat sa ilang Christmas bonus karong Disyembre.
Ang bonus kuhaon gikan sa Supplemental Budget No. 3 diin makadawat og tag P5 mil ang matag honorarium-based workers.
“Niduol man sila, ‘Mayor, kami diay?’ Mao na, nga akong gibutang sa budget karong Disyembre, inig-approve, first week of December manghatag nata og bonus sa tanang honorarium-based barangay employees; makakuha og Five thousand pesos,” segun pa ni Garcia.
“Sa kadugay nas panahon ang City Hall gali ang makadawat og Chirstmas bonus ang mga regular ug casual. Bag-o lang na kay naa koy ordinansa, makadawat na sad ang job order (nga mga empleyado). Unya karon, ang mga empleyado sa barangay nga nagdawat og honorarium gikan sa Cebu City Government, wa man diay silay bonus, susama ra sa mga tanod, lupon, BEO. Wa man diay,” dugang pa niya.(BANAT NEWS)
- Latest
