CEBU, Philippines — Nakadawat og tagsa ka ambulansiya ang mga siyudad ug lungsod sa unang distrito sa Probinsiya sa Sugbo lakip niini ang Dakbayan sa Talisay.
Ang mga mayor sa maong mga lugar ang personal nga nikuha sa mga ambulansiya ngadto sa Quirino Grandstand sa Luneta Park, Manila atol sa 90 ka tuig nga founding anniversary sa Philippine Charity Sweepstakes Office (PCSO).
Atol sa kalihokan si Presidente Ferdinand Marcos, Jr. ang pinasidunggang dinapit.
Nasayran nga 90 ka lokal nga kagamhanan ang beneficiaries sa maong mga ambulansiya.
Si Mayor Gerald Anthony “Samsam” Gullas, Jr. sa Dakbayan sa Talisay nagpasalamat tungod kay modugang kini nga kahimanan alang sa mga nagkinahanglan sa dinaliang pag-atiman sa medikal.
Samtang si Mayor Rajiv Enad sa Lungsod sa Minglanilla nidawat usab sa yawi sa ambulansiya kuyog nila ni Mayor Mytha Canoy sa Lungsod sa San Fernando, Mayor Patrick Barcenas sa Dakbayan sa Carcar ug Laude Dotis sa Lungsod sa Sibonga.
Ang mga mayor mapasalamaton sa ambulansya nga ilang nadawat tungod kay dako kini og tabang sa pag-atiman sa ilang mga konstituwente. BDB BANAT NEWS