Mandaue ug Talisay City

CEBU, Philippines — Sa Mandaue City, si Mandaue City Mayor Glenn Bercede misusi sab sa mga sementeryo  nga naglakip sa pribado ug publiko nga sementeryo sa siyudad. Adunay mga help desk nga gibutang aron adunay madangpan ang mga tawo kun dunay problema.

Samtang sa Talisay City, si Bise Mayor Richard Francis “Choy” Aznar nga mao sab ang chairman sa committee on health sa Dakbayan sa Talisay miawhag sa tanan nga maghinay-hinay sa pag-inom og ilimnong makahubog, apan dili kini angay buhaton diha sa sud sa mga sam-ang.

Naka estambay sa mga sam-ang mao ang mga sakop sa City Disaster Risk Reduction and Management Office (CDRRMO) nga moresponde sa emerhensya kauban ang mga sakop sa Talisay City Police Station.

Gihangyo sab ni Konsehal Alito Bacaltos, chairman sa committee on environment nga magdala og kaugalingong plastic bags aron mabutangan og basura ang mga manuaw sa mga sam-ang aron dili hugaw ang lugar ini og biya na nila. Si Police Lt. Col. Epream Paguyod, hepe sa kapolisan mihimo sab og inspeksyon sa mga sam-ang ug nipahimangno sa mga sakop sa ilang responsibilidad. Ang mga tawo kinahanglang mamauli na pag-abot sa alas-12 sa tungang gabii.

Si Jonathan Tumulak, pangu sa City of Talisay-Traffic Operation Development Authority (CT-TODA) sayo sab nga mipakatap sa iyang mga sakop diha sa kadalanan ilabi na kadtong duol sa mga sam-ang aron dili mabalda ang dagan sa trapiko.

Sa pikas bahin, si Cordova Mayor Cesar “Didoy” Suan miluwat og executive order paglatid sa mga guidelines alang sa mga moadto sa mga sam-ang.

Sa mga moadto sa sementeryo, magbukas ang mga sam-ang sa Cordova sugod alas 6 sa buntag hangtod alas 10 sa gabii gikan Nobyembre 1 hangtod Nobyembre 2. Ipatuman sulod sa mga menteryo ang “One Entrance, One Exit Policy” ug ginadili pud ang overnight.

Walay mga tindera ang gitugotan sulod sa mga menteryo gawas sa mga aprobado sa buhatan sa Mayor human nakasumiter og mga rekisitos nga gilatid sa Business Permit and Licensing Office.

Sa mga pribadong sam-ang, gidasig sa LGU nga mopatuman og kaugalingong “safety protocols.— Rowena Capistrano, Romeo Limpangog, Gabriel Bonjoc ug Le Phyllis F. Antojado /IBM BANAT NEWS