CEBU, Philippines — Usa patay ug laing usa ang angol sa nahitabong pagpamusil diha sa managlahi nga lugar sa Dakbayan sa Sugbo kagahapon sa kadlawon.
Patay ang usa ka 29-anyos nga babaye human kini pusila samtang nagduwa og computer diha sa Paradise II, Barangay Kinasang-an.
Ang biktima kinsa nakaangkong og samad pinusilan sa ulo mao si Josery Tabilo Apostole, walay trabaho, nagpuyo sa naasoy nga dapit dunay duha ka anak nga nag-edad og 6 ug 3-anyos.
Base sa imbestigasyon sa kapolisan nga ang tag-iya sa computer shop nakadungog kini og usa ka buto sa pusil ug sa iyang pagsusi nakita niini ang biktima sa lingkuranan nga wala na maglihok ug adunay samad pinusilan sa ulo.
Nakuha sa footage sa closed circuit television sa computer shop ang kriminal kinsa residente usab sa maong lugar ug giingong kaila sa biktima.
Giingong adunay kauban nga lalaki ang biktima samtang nagduwa og scatter diha sa computer shop ug nagkalalis ang duha ug nibunot og pusil ang maong lalaki ug gipusil ang biktima ug dali kining nisibat pahilayo sa lugar human sa maong hitabo.
Si Police Major Jiceree Basitao, hepe sa Inayawan Police Station sa Cebu City Police Office nagkanayon nga kalambigitan sa ilegal nga drugas ang gisubay nila nga motibo sa maong pagpamusil kinsa ang biktima giingong runner kini sa ilegal nga drugas.
Sa laing bahin, naangol ang usa ka 22-anyos nga lalaki human kini usab kini pusila diha sa T. Padilla Street, Barangay Day-as.
Ang biktima mao si Jerry Obien Ramos alyas “Amang” molupyo sa lugar.
Base sa imbestigasyon sa Parian Police Station sa Cebu City Police Office nga samtang naglingkod ang biktima giingong kalit naabot ang kriminal kinsa nagsul-ob og itom nga t-shirt ug puti nga karsones ug gipusil niini ang biktima.
Ang pagkasiaw ug kalambigitan sa ilegal nga drugas ang gilantaw sa kapolisan nga motibo sa maong pagpamusil.
Gikataho nga sa wala pa nahitabo ang pagpamusil giingong adunay gipakuratan ang biktima nga wala nakauyon sa iyahang gibuhat.
Nadakpan na usab duha ka higayon sa Parian Police Station ang biktima gumikan sa ilegal nga drugas.
Na-recover ang kapolisan diha sa lugar nga nahitaboan ang tulo ka empty shell ug duha ka deformed slug sa kalibre. 45 nga pistol. BDB BANAT NEWS