CEBU, Philippines — Aron mapalapdan ang kasayuran ug mapalig-on ang mga pamaagi sa food safety, ang Central Visayas Regional Food Safety Committee (CVRFSC) ug Technical Working Group (TWG), sa kooperasyon sa Department of Agriculture-Central Visayas (DA-7), nagpahigayon og Food Safety Forum ug Product Exhibit. Ang forum nga nag-ulohan og “Pagkaing Ligtas at Sapat, Kaagapay sa Maunlad at Matatag na Bagong Pilipinas,” gisalmutan sa nagkalain-laing ahensya sa gobyerno ug pribadong sektor, sama sa SM City-Cebu ug Cebu Chamber of Commerce and Industry (CCCI).
Si DA-Assistant Secretary for Policy and Regulations, Atty. Paz J. Benvidez II, nipadayag sa kamahinungdanon sa pag-establisar sa lig-on nga sistema sa pagkaon sa Pilipinas pinaagi sa pagpanalipod sa mga mag-uuma ug mangingisda gikan sa mga natural nga katalagman.
Sa laing bahin, si Bernard Choison, Assistant Vice President for Business Development sa CCCI, nagpasabot sa ilang LEAD agenda—"engage in the community, activate partnerships, and develop a culture of innovation and creativity."
Matud niya ang LEAD nagtugma sa misyon sa DA sa pagpalambo sa kaluwasan sa pagkaon pinaagi sa pagsunod sa Philippine Good Agricultural Practices (PhilGAP), Good Animal Husbandry Practices (GAHP), ug Good Aquaculture Practices (GAqP).
Aron mas mapalambo ang kahibalo, usa ka panel discussion ang gihimo nga naghisgot sa mga hagit sa GAP, GAHP, ug GAqP sa gagmay nga mga umahan, epekto sa antimicrobial resistance, ug pesticide residues, nga nagtinguha sa pagpalambo sa food security sa mga Filipino. MEL BANAT NEWS