CEBU, Philippines — Dose ka mga panimalay ang apektado sa sunog nga niulbo sa may Sitio Germilina, San Carlos Heights, Barangay Quiot ning Dakbayan sa Sugbo, Martes sa buntag, Oktobre 29, 2024.
Ang sunog naglambigit og kabalayan nga giingong nagsugod sa panimalay ni Rena Solomon.
Ang sunog nadawat sa kabomberohan alas 9:58 ug hingpit nga napawong alas-10:44 na.
Gibana-bana moabot ngadto sa P675 mil ang danyos sa sunog diin walay gikataho nga nakalas o naangol.
Sa 12 ka balay nga nasunog, ang walo niini lang ang naugdaw. Apan 11 ka pamilya o 45 ka individual ang apektado niini.
Si FO2 Marie Grace Ambayan ang imbestigador sa maong sunog padayon pa sila nipahigayon sa maong imbestigasyon sa hinungdan niini.
Base sa talaan sa Department of Social Welfare and Services 12 ka pamilya ang initial nga naapektohan o 47 ka individuals.
Ang evacuation center sa mga nasunogan naa usa kasamtangan sa Fatima Chapel San Carlos Heights ug naapod-aporan na usab sila og food packs. IBM BANAT NEWS