CEBU, Philippines — Ang Department of Education (DepEd) ug ang Integrated Bar of the Philippines (IBP) nipirma og Memorandum of Agreement kagahapon, Oktubre 28, aron maghatag og libreng legal nga tabang sa mga magtutudlo ug personnel sa DepEd sa tibuok nasud.
Matud ni Education Secretary Sonny Angara nga kining pakigtambayayong sa IBP maghatag sa mga magtutudlo sa publikong eskwelahan ug non-teaching personnel og legal nga advice ug uban pang legal concerns.
Kapin 100,000 ka non-teaching personnel sama sa mga administrative officers, accountants, clerks, ug bookkeepers lukop nasud ang makabenepisyo usab niining inisyatiba.
Samtang gipadayag usab ni Angara nga kini nagtimaan sa laing milestone sa paningkamot sa DepEd sa pagsuporta sa kaayohan sa mga magtutudlo, usa sa mga direktiba ni Presidente Ferdinand R. Marcos Jr ngadto sa ahensya.
Dugang pa niya nga dili lang kutob sa pagdayeg ang ilang ihatag sa mga magtutudlo, apan tinud-anay nga serbisyo ug pagpasalamat sa ilang mga kontribusyon.
“Hindi hanggang puri lang ang binibigay natin sa ating teachers, kundi tunay na serbisyo, tunay na public service, at pag-appreciate sa kanilang binibigay sa ating mga mahal sa buhay,” suma pa ni Angara. (BANAT NEWS)