120 ka kawani sa Umapad masweldohan–Lumapas

CEBU, Philippines — Giklaro ni Konsehal Libertin Lumapas sa Barangay Umapad ug sa unom niya ka kauban nga masweldohan ang ilang 120 ka kawani sa barangay. Gikataho nga ang maong mga kawani sukad pa sa buwan sa Enero niining tuiga hangtud niining mga panahona wala pa makadawat sa ilang binulan nga sweldo.

Naglakip kanila ang mga kawani sa clean and green, barangay tanod, Lupong Taga Pamayapa ug uban pa. Atol sa press conference gipasabot ni Lumapas nga bisan siya kon maoy mahingtungdan nga wala makadawat sa sweldo moreklamo usab siya. Matud ni Lumapas nga igo lang usab siya nga nisunod sa nalatid sa balaod hinungdan nga wala niya pirmahe ang payroll.

Si Lumapas nagkanayon nga isip chairman sa committee on appropraition iyang gikonsulta ang  Commission on audit (COA)  kon mahimo silang mosweldo sa ilang mga kawani nga gi-hire sa ilang kapitan nga wala mapaatubang ug approval  ngadto sa konseho.

Giingong ang COA niawhag kanila nga mangayo sila og suhistiyon sa Department of Interior on Local Government (DILG) ug suhistiyon niini maoy ilang tumanon alang sa pagsweldo sa ilang mga kawani.

Matud usab ni Lumapasa nga nahingangha na lang sila tungod kay ilang gihimo nga pagsunod sa gilatid nga lagda gipasakaan na hinuon sila og kaso ngadto sa Ombudsman. Sa kasamtangan ilang gipaabot ang tubag sa DILG nga maoy ilang basehan sa pagsweldo

Giklaro ni Lumapas nga adunay pundong salapi ang ilang barangay nga ikasweldo sa ilang mga kawani apan kinahanglan lang usab nga masunod ang gilatid nga mga lagda sa pagsiguro nga dili usab sila makahimo og kalapasan niini. (BANAT NEWS)