CEBU, Philippines — Gatusan ka mga corn growers ug stakeholders ang nagtapok atol sa 17th Philippine National Corn Congress nga gipasiugdahan sa Department of Agriculture, sa pakigtambayayong sa Philippine Maize Federation Inc. (PhilMaize).
Kini aron maghimo og mga plano nga makatabang sa pagpalambo ug pagpalig-on sa industriya sa mais sa tibuok nasud.
Ubos sa tema 'Maunlad na Maisan, Tungo sa Matatag na Bagong Pilipinas,' si Agriculture Secretary Francisco P. Tiu Laurel Jr. nipadayag sa iyang paglaum nga kining kalihukan makapalig-on sa panag-uban tali sa pribado ug publiko nga sektor aron suportahan ang mga tumong sa industriya sa mais.
Lakip sa tumong mao ang pagmugna og konkreto, komprehensibo, ug inklusibo nga mga plano nga motubag sa nagkalain-laing hagit nga giatubang sa industriya sa mais, sama sa ubos nga produktibidad, ubos nga presyo, limitado nga access sa modernong teknolohiya sa pagpanguma.
Si Laurel nipadayag nga ang departamento nag-ila sa importansya sa mais, ingon man sa kamoteng kahoy, hinungdan nga ang DA nagpadayon sa pagduso sa pag-uswag niini nga mga palaliton.
Subay niini ang ahensya nilusad sa Corn Production Enhancement Project aron suportahan ang mga mag-uuma sa pagpausbaw sa produksyon, pagdugang sa ilang kita, ug uban pa.
Ang proyekto nagsuplay og mga liso ug abono ngadto sa mga kalipikadong mag-uuma. Niadtong Agosto 2024, kapin na sa 1,700 metric tons nga binhi sa mais, dul-an sa 2.9 ka milyon nga mga liso sa balanghoy ang naapod-apod uban ang halos 6,000 ka metric tons nga abono. (BANAT NEWS)