CEBU, Philippines — Pipila lang ka oras human miluwat si Gobernador Gwendolyn Garcia og executive order nga nag-umol sa “Anti-Smuggling Inter-Agency Task Force” pagbatok sa ilegal nga pagpalusot sa mga baboy pasulod sa probinsya sa Sugbu, og mga motorbanca nga nagkarga og dili dokumentadong mga baboy ang midunggo sa baybayon sa Barangay Kanyuko sa lungsod sa Dumanjug.
Nasikop sa kapulisan ang duha bangka nga nagkarga og 79 ka baboy nga matud pa gikan sa Negros Oriental mga alas 11:30 sa gabii niadtong Oktubre 26.
Ang Dumanjug Municipal Police Station nakadawat og impormasyon kalabot sa umaabot nga bangka nga nagkarga og mga baboy, hinungdan nga mihimo kini og koordinasyon sa Municipal Livestock Coordinator, ug sa Philippine Coast Guard.
Pag-abot didto sa maong baybayon naabtan nila nga abandonado na kining motorbanca ug duha ka sakyanan -- usa ka Mazda truck ug Suzuki multicab nga gituohang maoy kargahan sa maong mga baboy.
Ang maong banka ug mga sakyanan lakip na ang mga baboy anaa na karon sa kustodiya sa otoridad.
Padayon ang pagsusi pag-ila sa mga nalambigit sa maong pagpalusot sa mha dili dokumentado nga mga baboy nga miabot didto sa lungsod sa Dumanjug.
Si Mayor Efren "Gungun" Gica nasagmuyo sa maong hitabo nga bisan og padayon ang ilang pag-monitor ug kampanya batok sa ilegal nga pagpalusot sa mga baboy padulong sa ilang lungsod aduna gihapoy magpalusot niini agi sa ilang baybayon.
Giisip kini ni Gica nga usa ka hagit kanila aron pangusgan pa ang ilang kampanya hilabina karon nga aduna nay EO ang gobernador nga nag-umol og anti-smuggling task force nga makatabang sa ilang operasyon.
Usa sa mga rason sa pag-umol sa maong kamandoan ug pagtukod og taskforce sa probinsya , mao ang pagkontrol sa pagpasulod og mga produkto ug mga binuhing hayop nga dili makolektahan og buhis.
Ikaduha niini mao ang pagsiguro nga luwas ang mga ipasulod nga mga produkto dinhi sa probinsya ilabi na ang mga binuhing hayop tungod sa mga sakit nga nikatap kaniadto sama sa African Swine Flu diin bilyones ka pesos nga industriya sa baboyan sa probinsya ang naapektahan. — /IBM (BANAT NEWS)