CEBU, Philippines — Gitagbo ni Talisay City Mayor Gerald Anthony “Samsam” Gullas, Jr. ang mga prinsipal ug administrador sa pribadong mga tunghaan sa Dakbayan sa Talisay niadtong niaging semana.
Tuyo ni Gullas nga maestorya silang tanan kabahin sa pagsuspenso sa klase panahon nga adunay dili maayong lakat sa panahon.
Niabot sa 40 ka prinsipal ug school administrator ang nitunga sa buhatan sa mayor.
Nagkanayon si Gullas nga matag suspenso sa klase dili siya manghilabot sa pribadong tunghaan isip respeto sa ilang local autonomy.
Nasayran nga si Gullas adunay mga nadawat nga mensahe gikan sa mga Talisaynon nga nangutana nganong dili niya maapil sa pagkanselar ang klase sa mga pribadong tunghaan sa siyudad.
Sa maong tigom adunay gipahigayong botasyon kalabot sa maong isyu diin nabahin ang opinyon sa prinsipal ug administrador.
Gikataho nga nihangyo ang kadaghanan sa mga pribado nga tunghaan nga hatagan sila og katungod nga modesisyon.
Si Gullas nagkanayon nga girespito niya ang mga prinsipal kinsa sila usab nirespeto sa buhatan sa mayor.
Ug kong adunay lain nga class suspension nga ideklara ang mayor alang lang kini sa pampubliko nga tunghaan samtang depende na sa pribadong tunghaan ang pagdesisyon sa ilahang habig. — /BDB (BANAT NEWS)