CEBU, Philippines — Gibutyag ni Konsehal Joel Garganera nga sugdan na sa last quarter sa sunod tuig ang pagtukod sa P4.8 billion waste-to-energy (WTE) project tungod kay nakasinati og kakulian ang New Sky Energy Philippines, Inc. sama sa wala pa makakuha og dokumento gikan sa Department of Environment and Natural Resources (DENR), Department of Energy (DOE) ug Department of Agrarian Reform (DAR).
Si Garganera kinsa chairman sa Committee on Environment, Natural Resources and Energy sa konseho nagkanayon nga atol sa pakighinabi sa usa ka hugna sa ‘Pagtuki, Pagsusi, Pagsuta’ pinaagi sa ‘Sugboanon Channel’ nga nagpadala og suwat ang New Sky ngadto sa siyudad diin nangayo kini og usa ka tuig nga paglugway alang sa pagtukod sa pasilidad tungod kay kinahanglan nga unahon ang pagproseso sa mga permit ug uban pa nga mga kontrata.
Matud ni Garganera nga nisamot usab ang kalangay sa pagtukod niini human niluwat og memorandum ang DOE nga isuspenso ang tanang aplikasyon alang sa biomass energy operations gikan sa Hunyo 25 hangtud sa Nobiyembre 25, 2024.
Gawas sa DENR ug DOE, apil usab nga nibabag ang DAR tungod kay kinahanglan pa sa New Sky nga makakuha og mga clearance sa mga property nga gusto niini nga gamiton alang sa pasilidad.
Dugang babag sa proyekto mao nga ang kasamtangang legal nga away tali sa siyudad ug usa ka pribadong kompaniya alang sa pagpanag-iya sa Inayawan landfill diin nakamugna kini og komplikasyon.
Gilantaw ni Garganera nga ang Inayawan landfill mao ang pinakahaom nga tukoran sa maong WTR facility apan tungod kay ubos pa sa litigasyon ang maong landfill nakahukom ang New Sky nga mopalit og 6.9 nga ektarya nga luna ngadto sa Barangay Guba ug adto tukoron ang maong pasilidad.
Sa pagpakighinabi sa Banat News si Garganera nagkanayon nga nakigtagbo na usab siya sa barangay council members ug sa mga sitio leader sa Barangay Guba aron mapahibalo ang maong proyekto nga tukoron ug mapasabot kabahin sa WTE facility.
Magpahigayon usab og public hearing kauban ang mga representante sa DENR, DOE, NGCP, VECO, EMB, ug DA kon makaangkon na ang New Sky sa mga gikinahanglan nga mga resikitos.
Bisan pa sa mga kakulian nga giatubang sa New Sky nipadayag gihapon kini sa ilang interest nga ipadayon ang proyekto sa siyudad aron makatabang sa paghatag og solusyon sa problema sa basura. —/BDB (BANAT NEWS)