Pagpanakop sa mohatag og limos ipatuman na karon sa Cebu City

CEBU, Philippines — Nanawagan si Cebu City Anti-Mendicancy Board, Dr. Lucelle Mercado nga ipatuman na sugod karong adlawa, Oktubre 28, 2024 ang information and education campaign kabahin sa ilang slogan nga “Ang paghatag  maayo apan sa kadalanan DILI HUSTO”.

Base sa report sa Cebu City News and Information, gibutyag ni Mercado nga atol sa ilang senimana nga panagtagbo nasabotan nga tinud-on na nila ang ilang pagpanakop kong adunay masakpan nga manghatag diha sa kadalan ug i-rescue usab nila ang mga magpakilimos sa siyudad.

Ang mga madakpan makamulta kini og P500 sa paglapas Cebu City Ordinance 1631 o Anti-Mendicancy Ordinance.

Ang mga grupo ug indibidwal nga gusto mohatag tungod sa kalooy apan nasakpan kini sa mga otoridad mahimong makiha.

Gidasig usab nila Mercado ang mga grupo o indibidwal nga adunay malumo nga kasing-kasing nga mohatag tungod sa kalooy nga mamahimong ipadala ang ilang hinabang ngadto sa lisensiyadong ahensiya sa gobiyerno. — /BDB (BANAT NEWS)