P4.47 milyones gigahin sa Kapitolyo sa Panagbagat Festival

CEBU, Philippines — Moabot sa P4.47 milyones ang nadawat sa lungsod sa Poro alang sa Panagbagat Festival niini nga gipahigayon niadtong Oktubre 26.

Migahin ang Kapitolyo og P3 million alang mismo sa LGU nga gipangulohan ni Mayor Gary Rama aron makabawi sa nagasto sa lungsod alang sa nagkadaiyang socio-cultural nga kalihokan.

Ang upat usab ka grupo gikan sa mga clustered barangays nga niapil sa maong festival, nakadawat og tag P300,000 matag usa isip suporta.

Sa bahin ni Deputy Speaker Duke Frasco, mihatag usab kini og P130,000 alang sa top four contingents. P50,000 alang sa first place; P40,000 sa ikaduhang mananaog ug P30,000 sa ika-tulo nga mananaog ug P10,000 sa fourth placer. Tungod kay natandog si Governor Garcia sa gihimong pasundayag sa mga mananayaw, iyang gitugbangan og dugang P140,000 ang gihatag ni Frasco alang sa mga clustered contingents gikan sa iyang kaugalingong pundo.

“You have gone a long, long way,” matud ni Garcia sa iyang speech. — /MEL (BANAT NEWS)