Pagsirado sa karsada haduol sa mga sam-ang ipatuman

CEBU, Philippines — Gipahibalo sa buhatan sa City Traffic Management System (CTMS) sa siyudad sa Lapu-Lapu nga ipatuman ang road closure kun pagsirado sa mga karsada sa siyudad nonot sa pagsaulog sa Kalag-Kalag karong Nobiyembre 1 ug 2, 2024.

Suma pa ni Mario Napule ang pangulo sa CTMS nga ang mga dalan diin nahimutang ang  pribadong sementeryo sa Marigondon ug publikong sementeryo sa Humay-Humay sa Barangay Gun-ob ang dili paagian og sakyanan.

Dugang niini sugdan sa pagsirado ang mga dalan sa Nobiyembre 1 ug 2 sa alas 4 sa kaadlawon hangtod sa alas 12 sa tungang gabii.

Samtang gidili ang pag-parking sa pikas habig lamang sa mga dalan nga nagpaingon sa sementeryo ug gidili ang pagsulod niini gawas kun adunay sakay nga senior citizen, buntis ug adunay kakulian sa panglawas sama sa PWD's.

Sa Barangay Mactan diin nahimutang usab ang pribadong sementeryo walay himoon nga pagsirado sa dalan apan adunay idistino nga 25 ngadto sa 30 ka mga traffic enforcers.

Si Police Lieutenant Christian Torres, tigpamaba sa Lapu-Lapu City Police Office (LCPO) miingon nga hugot usab nilang gidili ang pagpasulod sa menteryo sa mga armas ug mahait nga hinagiban apil na ang mga ilimnong makahubog. — /MEL (BANAT NEWS)