CEBU, Philippines — Gitinguha sa kagamhanan sa dakbayan sa Sugbo ang pag-organisar sa mga vendors diha sa mga sam-ang atol sa pagsaulog sa Kalag-Kalag karong Nobiyembre 1 ug 2, 2024.
Una niini si Dr. Lucelle Mercado, chairperson sa Garbo Asenso Sumbanan Alyansa(GASA) miklaro nga tugtan ra ang mga vendors nga makatinda sa mga sam-ang apan kinahanglan nga sila organisado ug napahiluna og tarong.
Ang pangu sa Cebu City Transportation Office (CCTO) Raquel Arce kinsa sakop usab sa GASA miingon nga kasagaran sa mga vendors maninda lang diha sa mga sementeryo panahon sa All Saints ug All Soul’s Day o Kalag-Kalag.
Subay niini ang mga vendors segun pa sa Cebu City PIO kinahanglan makig-coordinate sa mga barangay kun asa nasakop ang maong mga sam-ang.
Dugang pa ni Arce nga importante nga masiguro nga dili makabalda sa dagan sa trapiko ingon man sa mga pedestrians nga mosulod sa menteryo ang maong mga vendors.
Karong adlawa, Oktubre 28, himoon ang final coordination meeting tali sa management/representatives sa nagkalain-laing sementaryo aron hisgutan ang kabahin sa traffic ingon man sa mga lugar nga mahimong tugtan ang mga vendors sa pagpamaligya.
Una niini ang CCTO nipahimangno na sa publiko nga nagplano sa pagbisita sa ilang mga mahal sa kinabuhi nga nitaliwan na nga planohon ang ilang byahe og sayo ilabi na kay ipatuman ang traffic re-routing sugod karong October 31.
Gipagawas na usab sa CCTO ang ilang traffic plan alang sa Kalag-Kalag ug mahimo kining makita sa ilang facebook page o ba kaha sa Cebu City PIO aron masuta ang mga specific areas nga mahimong makaagi ang mga sakyanan. — /MEL (BANAT NEWS)