CEBU, Philippines — Upat ka mga POGO- like activity ang gibutyag nga gimonitor sa National Bureau of Investigation Central Visayas dinhi sa Sugbo sumala pa ni Atty. Rennan Augustos Oliva, ang rehiyonal nga director sa NBI-7.
Matud pa ni Oliva, nakadawat sila og mga impormasyon mahitungod niini dinhi sa Sugbo.
Sumala pa ni Oliva kining maong POGO- like activities nag-operate sa Dakbayan sa Sugbo ug sa Cebu Province. Gipadayag ni Oliva, human sa pagkabisto sa operasyon sa POGO sa Barangay Agus sa Lapu-Lapu City ug sa lungsod sa Moalboal adunay daghang niabot nga mga impormasyon diha sa ilang buhatan.
Ang mga impormasyon giingong nanghangyo kanila sa pag verify sa maong kalihukan nga may pagkasusama og POGO diha sa ilang mga lugar.
Gitug-an ni Oliva nga kun makopirmar nga tinuod kining maong mga impormasyon ilaha gyud kining aksyonan.
Ang POGO hingpit nga gi-ban dinhi sa nasud ni Presidente Ferdinand Marcos Jr. tungod sa mga ilegal nga mga kalihokang nanghitabo luyo sa mga operasyon niini. -- IBM BANAT NEWS