CEBU, Philippines — Ang bag-ong nakumpleto nga bulk water project sa lungsod sa Moalboal ang gikatakdang inugurahan sa mga opisyal sa Probinsya sa Sugbo ingon man sa lungsod karong Oktubre 28.
Ang maong proyekto sa tubig nga gipondohan sa Kapitolyo gipaabot nga makasuplay og 6, 000 ka metro-kubiko sa tubig diin 8, 690 ka panimalay ang makabenipisyo.
Ang Kapitolyo migahin og P317 milyones alang sa maong proyekto sa tubig.
Ang lungsod sa Moalboal maoy usa sa 25 ka mga lungsod ug siyudad sa lalawigan nga apil sa bulk water system project sa Kapitolyo nga ang tinguha mao ang pagtubag sa nagkataas nga demand sa potable o mainom nga tubig sa Probinsya.
Ang ubang mga LGUs mao ang San Fernando, Argao, Barili, Boljoon, Oslob, Samboan, Alcoy, Alegria, Baidan, Dalaguete, Tuburan, Asturias, Pinamungajan, Aloguinsan, Tabogon, San Remigio, Tabuelan, Sogod, Dumanjug, Ronda, Alcantara, Malabuyoc, Ginatilan ug Santander.
Ang Kapitolyo miumol pa og Provincial Water Resources Authority (PWRA) ubos sa section 8 sa Water Code of Province of Cebu of 2022 nga ang tahas maoy ang paggama ug pag establisar og sistematiko ug komprehensibo nga plano pag develop sa tanang tinubdan sa tubig lakip ang bulk water system sa Probinsya sa Sugbo.
Ang PWRA gipangulohan ni gobernadora Gwendolyn Garcia.
Ang Kapitolyo naggahin og P3.3 bilyones alang sa pagtukod og bulk water system, lakip na ang treatment facilities, pipeline, reservoir ug uban pa. MEL BANAT NEWS