Kanhi kapitan sa Tejero ug laing usa, gipangkiha

CEBU, Philippines — Chairman ug CEO sa Oriental Port and Allied Services Corporation Atty. Tomas Riveral, nisang-at ug kiha nila ni kanhi Tejero Barangay Captain Jessilou Cadungog ug Franklin Supatan ngadto sa Cebu City Prosecutors Office niadtong Huwebes.

Gitug-an ni Riveral ang iyang gipangkiha mga retired na nga trabahante ug si Cadungog kanhi presidente sa local union sa OPASCOR.

Ang pagpasaka niya og reklamo batok nila ni Cadungog ug Supatan naggumikan sa akusasyon nga ilang giluwatan atol sa ilang general assembly niadtong September 17, 2024.

Lakip sa giingong akusasyon mao ang wala niya pagpahigayon ug election sulod sa pipila ka tuig, ug pagka alkanse sa kompanya ug uban pa nga pulos walay kamatuoran.

Sumala pa ni Riveral, gitun-an usab nila ang posibilidad sa pagsang-at og kasong cyber libel batok sa duha ka tawo gumikan sa pagdaut sa iyang kadungganan.

Gitan-aw pa usab ni Riveral ang civil liability ug moral damages nga nahimo sa maong mga respondents ilabi na sa mga bakak nga estorya batok kaniya.

Giklaro ni Riveral ang pagpasang-at niya ug kaso kang Cadungog walay labot sa pagdagan niini isip konsehal sa siyudad sa Sugbo kay dili man siya politiko ug walay interest nga molansar.

Kahinumduman niadtong September 17 si Cadungog nga mao ang kanhi presidente sa OPASCOR employees-union-alu tucp mipagawas sa iyang sentimento batok sa nagdumala sa OPASCOR nga si Riveral atol sa ilang tigum nga gipahigayon.

Si Cadungog sa iyang bahin miingon nga wala pa siya makadawat sa kiha ni Riveral ug andam kini niyang tubagon.

Gibutyag ni Cadungog nga tanan iyang gipamulong atol sa ilang tigum pulos tinuod ug walay bakak.  MEL BANAT NEWS