Mga polis ipakatap sa Talisay sa dili pa ang Kalag-Kalag

CEBU, Philippines — Makita na sa mga sam-ang sa Dakbayan sa Talisay ang kapolisan duha ka adlaw sa dili pa ang Kalag-Kalag.

Gibutyag ni Police Lt. Col. Epream Paguyod, hepe sa kapolisan nga aduna na silay augmentation gikan sa probinsya sa Sugbo.

Gawas pa niana iya nang gihangyo ang mga force multiplier ug mga barangay tanod aron motabang sa pagpatuman sa kahapsay ug kalinaw sa obserbasyon sa adlaw sa mga kalag ug Santos.

Sigon pa ni Paguyod nga magbutang sila og police assistance desk diha sa mga sam-ang.

Nipagawas na usab sa ilang traffic plan ang City of Talisay Traffic Operation Development Authority (CT-TODA).

Ang mga sakyanan dili na makasulod duol sa mga sam-ang aron dili masamok o matrapik.

Ang Talisay adunay pito ka mga sam-ang nga pagabantayan sunod semana.

Samtang sa laing bahin gihangyo sa kapolisan sa Talisay nga dili himuon nga kalingawan ang pagpanghadlok sa mga tawo.

Kini ilabi na ang kabahin sa pagpamomba kun bomb threat diin suma pa ni Police Lt. Col. Epream Paguyod nga adunay balaod nga mahimong mapasakaan og kaso ang mga tawo nga magpasiugda sa “bomb threat” o bisan unsa nga ipakatap nga impormasyon nga dili tinuod.

Matud pa niya nga wala pa hinuon nahitabo sa Talisay ang “bomb threat” sa iyang paglingkod ug siya nanghinaot nga dili sab kini mahitabo. Sa nasayran duha ka unibersidad sa siyudad sa Sugbo ang nakadawat og pagpanghulga sa pagpamomba nga miresulta sa pagkabalda sa klase tungod kay gipapauli ang mga estudyante.

Nagkanayon si Paguyod nga dako og kahasol ang panghitabo busa kung mahibaw-an lang ang mga tawo nga nagpasiugda angayan nga pahamtangan gyud og kaso.  MEL BANAT NEWS