CEBU, Philippines — Moabot sa 40 ka mga iro ang gihipos sa Department of Veterinary Medicine and Fisheries gikan sa nagkadaiyang sam-ang sa Dakbayan sa Sugbo kagahapong adlawa, Oktubre 25, 2024.
Karon nga nagkaduol na ang kalag-kalag, ang impounding team sa DVMF nagpahigayon og Catch-Neuter-Vaccinate-And-Release sa mga nadakpang mga iro.
Kini ilang gidakop gikan sa Queen City Memorial Garden, Doña Pepang Cemetery, Carreta Public Cemetery, Barangay Luz Public Cemetery, Calamba Public Cemetery, Veteran’s Memorial Park sa Barangay Labangon, Talamban Public Cemetery, Cempark Cemetery sa Barangay Banilad, Golden Haven Memorial Park, Hubao Public Cemetery sa Barangay Agsungot.
Gisaysay sa pangulo sa DWVF nga si Dr. Alice Utlang pinaagi sa pagpakighinabi sa Banat News nga moabot ngadto sa 34 ka mga babaye nga iro ug unom ka mga lalaki na iro ang ilang gihipos.
Kasagaran niini walay mga tag-iya ug didto na nagpuyo sa menteryo.
Inig human sa pagpahigayon sa CNVR, ibalik ra sab kini sa ilang teritoryo.
“Ibalik nato sila kay it’s the most humane way in controlling the population, dili kay sa pound nga dili sila happy ug lagmit masakit sab sila kay tungod sa kadaghan nila”, suma pa ni Dr. Utlang. (BANAT NEWS)