CEBU, Philippines — Kasong reckless imprudence resulting in homicide ang ipasaka batok sa usa ka 62 anyos nga tag-iya sa fish pen diha sa Barangay Banilad sa Siyudad sa Mandaue nga giingong nag-install og live wire nga maoy nakaingon sa kamatayon sa 13-anyos nga batang lalaki nga namasol sa lugar kauban sa iyang mga higala.
Nahitabo kini alas 4 pasado ang takna niadtong Oktobre 20, 2024 nga dihang ang biktima ug mga higala namasol og isda sa lugar.
Ang maong lim-aw gikonsiderar nga pangpublikong fish pen.
Si Police Lieutenant Colonel Mercy Villaro, tigpamaba sa Mandaue City Police Office (MCPO) miingon nga gipasakaan og kaso mao si Wilfredo Libongcogon.
Matud pa ni Villaro nga miubog sa tubig ang bata kay nasangit ang pasol niini, apan nahikapan niini ang live wire hinungdan nga kurentihan. Patay na kini pagabot sa Mandaue City Hospital.
Ang suspek niangkon nga iyang gibutangan og live wire ang iyang fish pen kontra mga kawatan ug mga langgam nga mosakdap sa mga gibuhi niyang isda. (BANAT NEWS)