CEBU, Philippines — Patay ang usa ka 16-anyos nga lalake human gipusil sa ama-ama sa iyang amigo diha sa Purok 2, San Vicente, Barangay Don Pedro, Dakbayan sa Bogo niadtong Huwebes sa gabii.
Biktima giingong naka-rekord pa sa iyang cellphone kun si kinsa ang nagpusil kaniya.
Ang 16-anyos nga biktima residente sa Barangay Cayang sa maong dakbayan samtang ang suspetsado mao si Elbert Villaruel, 32, dunay kaipon ug nagpuyo sa Barangay Don Pedro sa maong dakbayan.
Sa imbestigasyon sa Bogo City Police Station ang biktima nag-inom kuyog sa iyahang amigo nga anak-anak matud pa sa suspetsado.
Dihang padulong na unta kini mouli sakay sa motorsiklo niini giingong kalit lang siya gipusil sa suspetsado pag-abot sa may eskina. Nakadagan pa ang biktima ug nangayo og tabang sa mga nagpuyo sa lugar.
Gidala sa tambalanan ang biktima apan gideklarar nga dead-on-arrival.
Matud pa dunay video sa cellphone kun diin ang biktima nakasulti kinsay nagpusil niya nga mao ang suspetsado.
Sa gihimong hot pursuit operation ang suspetsado nasikop apan kini mihimakak sa pasangil.
Nangangkon siya nga natulog siya sa ilang balay sa dihang nahitabo ang krimen. Apan nagtuo ang kapulisan nasuko kini ngadto sa biktima kay giingong gibadlong niini ang biktima kay banha kaayo samtang nag-inom. (BANAT NEWS)