Seawall sa coastal barangay sa Talisay nangaguba
CEBU, Philippines — Nangaguba sa kusog nga bawod ang seawall sa mga coastal barangay sa Dakbayan sa Talisay gumikan sa bagyong Kristine.
Ug gumikan sa maong sitwasyon temporaryo nga gisira ang karsada diha sa Sitio Litmon, Barangay Dumlog.
Si Mayor Gerald Anthony “Samsam” Gullas, Jr. dali nga nipasusi sa lugar aron kahimoan dayon og aksyon.
Nagkanayon si Gullas nga base sa ilang pagsusi girekomendar ang pagbuhos og yuta sa lugar nga gikankan sa bawod.
Nihangyo si Gullas sa mga motorista nga likayan una ang pag-agi sa dapit aron dili madisgrasya.
Gipasusi usab ni Gullas ang tanan nga seawall sa taga engineering office aron ila kining usahon sa pag-ayo.
Ang seawall dako og tabang sa mga residente diha sa kabaybayonan aron mapanalipdan sila sa dako nga bawod ug malikay ang ilang kabalayan nga maguba. (BANAT NEWS)
- Latest
